گرے لسٹ سے نکلنے کیلئے قانون سازی ضروری،8بل تیار کرلئے:شاہ محمود قریشی

گرے لسٹ سے نکلنے کیلئے قانون سازی ضروری،8بل تیار کرلئے:شاہ محمود قریشی

  

ملتان (مانیٹرنگ ڈیسک) وزیر خارجہ شاہ محمود قریشی نے کہا ہے کہ گرے لسٹ سے نکلنے کے لیے قانون سازی ضروری ہے۔ ایف اے ٹی ایف کے 8 قوانین پر وزارت قانون کے ساتھ مشاورت کی ہے۔ملتان میں پریس کانفرنس کرتے ہوئے شاہ محمود قریشی نے کہا کہ ملک میں کورونا وائرس کے انفیکشن میں بتدریج کمی آرہی ہے۔ ماہرین کے تجزیے تھے کہ حکومت کی کووڈ 19 مینجمنٹ سے لوگ مطمئن نظر نہیں آ رہے تھے اور وہ سندھ کی حکومت کی حکمت عملی اور ان کے سخت لاک ڈاؤن کی نشاندہی کرتے تھے اور سوال کرتے تھے کہ پنجاب اور مرکزی حکومت ایسا کیوں نہیں کر رہی۔۔وفاقی وزیر نے کہا کہ وبا سے نشتر میڈیکل یونیورسٹی ملتان کے وائس چانسلر کا انتقال ہوا، میری دعا ہے کہ اللہ انہیں اور اس وبا سے جاں بحق دیگر افراد کی مغفرت فرمائے اور ان کے اہلخانہ کو صبر عطافرمائے۔شاہ محمود قریشی کا کہنا تھا کہ ہماری سمارٹ لاک ڈاؤن کی جو حکمت عملی تھی، وہ کارآمد ثابت ہوئی اور آج دنیا نے اس کی تقلید کی ہے اور عمران خان صا نے جو وڑن دیا تھا، آج دنیا کے بہت سے ممالک اس کی پیروی کر رہے ہیں۔وزیر خارجہ نے کہا کہ ہمارا انفیکشن ریٹ بتدریج کم ہو رہا ہے، اموات بتدریج کم ہو رہی ہیں، ہسپتالوں پر دباؤ اور وینٹی لیٹرز پر لوگ کم ہو رہے ہیں اور اللہ نے چاہا تو ہم اس بیماری کو ختم کرنے کے قریب ہیں۔تاہم ان کا کہنا تھا کہ ابھی دو امتحان باقی ہیں، ہماری اپیل ہے کہ لوگ احتیاط جاری رکھیں، عید قرباں قریب ہے اور ہماری گزارش ہے کہ اپنے اور اپنے گھر والوں کے لیے احتیاط کیجیے کیونکہ ذرا سی غفلت ایک نئے عروج کا سبب بن سکتی ہے۔شاہ محمود قریشی نے کہا کہ ہمیں ماہ محرم میں اگلے چیلنج کا سامنا کرنا ہے، محرم میں عزاداری ہوتی ہے، ہمیں ا سکا پورا احترام اور اس کی اہمیت کا احساس ہے لیکن علما و مشائخ سمیت دینی اکابرین سے درخواست ہے کہ وہ ایس او پیز پر عمل کروائیں اور اپنے طبقے کو محفوظ کرنے کے لیے تعاون فرمائیں۔ایک سوال کے جواب میں انہوں نے کہا کہ خواہش ہے آنے والے پنجاب کے بجٹ میں سالانہ ترقیاتی پروگرام میں جنوبی پنجاب کا علیحدہ کتابچہ ہونا چاہیے۔ ساؤتھ پنجاب سیکرٹریٹ کے قیام کے لیے عملی اقدامات کیے جارہے ہیں۔انہوں نے کہا ہمارا مطالبہ ہے جنوبی پنجاب کے لیے ایک علیحدہ پبلک سروس کمیشن قائم کیا جائے، صوبہ بننے میں وقت لگے گا، ہمارے پاس ٹوتھرڈ میجورٹی نہیں۔ جنوبی پنجاب صوبہ بننے سے لوگوں کے مسائل حل ہوں گے۔ جنوبی پنجاب کے دارالحکومت کا فیصلہ چند لوگ نہیں کریں گے۔ یہ فیصلہ میرٹ پر کیا جائے گا۔ میری رائے میں صوبائی دارالحکومت ملتان کو ہونا چاہیے۔ نئے صوبے کے قیام میں پیشرفت پروزیراعظم اوروزیراعلیٰ پنجاب کے شکرگزارہیں۔مقبوضہ کشمیر کے حوالے سے شاہ محمود قریشی کا کہنا تھا کہ مقبوضہ وادی قابض بھارتی فوج کے مظالم جاری ہیں۔ وہاں پر مساجد پر تالے لگائے گئے۔ حالات بتدریج بگڑ رہے ہیں۔ جبکہ ایل او سی پر دشمن ملک کی خلاف ورزیاں جاری ہیں۔فنانشل ٹاسک فورس کے حوالے سے ان کا کہنا تھا کہ ایف اے ٹی ایف کے حوالے سے8بل تیارکرکیے ہیں۔ گرے لسٹ ہمیں پچھلی حکومت سے ملی، وہاں سے نکلنے کے لیے قانون سازی درکار ہے، ایف اے ٹی ایف کے8قوانین پرلا،فنانس منسٹری کے ساتھ مشاورت کی ہے۔ بھارت کی پوری کوشش ہے پاکستان کوبلیک لسٹ میں دھکیلے۔ تمام بلزمشاورت کے لیے اپوزیشن کوبھیج دیئے ہیں۔ پیرکواپوزیشن کے ساتھ نشست ہوگی دیکھیں گے کیا پیشرفت ہوتی ہے۔ایک اور سوال کے جواب میں وفاقی وزیر خارجہ کا کہنا تھا کہ اتوار کو اقوام متحدہ کے جنرل اسمبلی کے الیکٹ ہونے والے صدر پاکستان آرہے ہیں، اقوام متحدہ کے صدر پاکستان کی دعوت پر پاکستان آرہے ہیں۔

شاہ محمود

مزید :

صفحہ اول -