بلدیاتی الیکشن کے لئے حلقہ بندیوں کی تیاری

صوبائی الیکشن کمیشن نے صوبے میں متوقع بلدیاتی انتخابات کے انعقاد کی تیاریاں شروع کر دی ہیں اور اضلاع میں حلقہ بندیوں کے لئے نقشے تیار کرنے کی ہدایات بھی جاری کر دی ہیں۔ پنجاب حکومت یہ انتخابات ستمبر میں کرانے کا اعلان کر چکی ہے بعض اطلاعات ایسی ہیں کہ حکومت یہ ایک ماہ آگے لے جانا چاہتی ہے، تاہم الیکشن کمیشن کے فرائض اپنے ہیں، صوبائی الیکشن کمیشن نے واضح ہدایات کے تحت کمشنر حضرات کے توسط سے تمام اسسٹنٹ کمشنر حضرات کو ہدایت کی ہے کہ وہ اپنے اپنے دائرہ اختیار کے علاقے میں یونین کونسلوں کے نقشہ جات کی تیاری شروع کر دیں۔معاصر کی خبر میں بتایا گیا ہے کہ لاہور کی پانچ تحصیلوں کے اسسٹنٹ کمشنر حضرات کو274 یونین کونسلوں کے نقشہ جات تیار کر کے فراہم کرنے کی ہدایت کی گئی ہے۔ صورت حال یہ ہے کہ اگر نقشے ہی نہ ہوں تو بلدیاتی امیدواروں کو حلقہ بندی کے حوالے سے اپنے اعتراضات دائر کرنے میں پریشانی ہو گی، اس لئے یہ کام جلد مکمل کرنے کی ہدایت کی گئی ہے۔دوسری طرف حکومت پنجاب ابھی تک بلدیاتی قانون کو حتمی شکل نہیں دے پائی اور اس میں ترامیم تیار کی جا رہی ہیں۔ اگر حکومت نے قانون میں ایسی تبدیلیاں کیں جو حلقہ بندی پر اثر انداز ہو سکتی ہوں تو زیادہ مشکل ہو جائے گی، بہتر عمل ہو گا کہ حکومت قانون کی نوک پلک سنوار کر جلد از جلد منظور کرائے تاکہ الیکشن کمیشن تمام انتظامات اس کے مطابق کر سکے۔ اگر قانون میں تاخیر ہوئی اور کوئی ایسی شق رکھ دی گئی، جس سے الیکشن کمیشن کی حلقہ بندیوں پر اثر پڑے تو پھر مشکل ہو گی اور انتخابات میں تاخیر کا سبب بن سکتی ہے، حکومت کو خود اس کا خیال رکھنا ہو گا۔