اداکارہ ماورہ حسین نے غریب نوجوان کی یونیورسٹی فیس کی ادائیگی کا اعلان کردیا

اداکارہ ماورہ حسین نے غریب نوجوان کی یونیورسٹی فیس کی ادائیگی کا اعلان کردیا
اداکارہ ماورہ حسین نے غریب نوجوان کی یونیورسٹی فیس کی ادائیگی کا اعلان کردیا

  


کراچی (ڈیلی پاکستان آن لائن) لالی ووڈ اداکارہ ماورہ حسین نے آزاد کشمیر سے تعلق رکھنے والے ایک غریب نوجوان کی یونیورسٹی فیس کی ادائیگی کا اعلان کردیا۔

ماریہ احمد نامی خاتون صارف نے ماورہ حسین کی انسٹاگرام پوسٹ پر اپنے بھائی کی یونیورسٹی فیس کی ادائیگی کیلئے مدد کی اپیل کی ۔ اداکارہ نے اپنی اس پوسٹ میں ساتھی اداکار فہد مصطفیٰ کو سالگرہ کی مبارکباد دی تھی۔ ’ سالگرہ مبارک ہو میرے ہیرو، ہمیشہ ایسے ہی شاندار انسان رہنا جیسا کہ تم اب ہو، آپ کی سالگرہ پر میں دعا گو ہوں کہ یہ سال آپ کیلئے بہت زیادہ پیار، خوشیاں اور کامیابیاں لے کر آئے۔‘

انسٹاگرام@mawrellous

ماریہ کے مطابق ان کے والدین 2005 میں آزاد کشمیر کے زلزلے میں اس دنیا سے رخصت ہو گئے تھے ۔ وہ اور اس کا بھائی انتہائی مشکل حالات میں بھی تعلیم کا سلسلہ جاری رکھے ہوئے ہیں۔ بھائی ایک دکان پر ملازمت کرتا ہے جبکہ اور ہوم ٹیوشن بھی پڑھاتا ہے۔ماریہ نے بتایا کہ ’آج میرے بھائی کا داخلہ ملک کی اچھی یونیورسٹی میں ہوا ہے مگر ہم اتنے غریب ہیں کہ داخلہ فیس نہیں ادا کر سکتے، اگر بھائی نے فیس جمع نہ کرائی تو داخلہ ضائع ہو جائے گا اور اس کی پوری زندگی کی محنت پر پانی پھیر جائے گا۔‘ ماریہ نے کہا کہ وہ اپنے بھائی کی فیس کیلئے یہاں درخواست کرنے پر شرمندہ ہیں ۔ انہوں نے ان تمام لوگوں سے رابطہ کرنے کی درخواست کی جو ان کے بھائی کی فیس ادا کرنے کی استطاعت رکھتے ہوں۔

انسٹاگرام@maria_ahmed133

خاتون فالور کی درخواست پر اداکارہ ماورہ حسین نے فوری جواب دیا اور کہا کہ انہیں یونیورسٹی فیس براہ راست ادا کرنے میں خوشی ہوگی۔ ’ میں آپ کو ڈائریکٹ میسج نہیں کرسکتی اس لیے مجھے اپنی تفصیلات سے آگاہ کردیں جس کے بعد میری ٹیم آپ سے جلد از جلد رابطہ کرے گی‘۔ اداکارہ نے خاتون کو نصیحت کی کہ وہ اللہ کی ذات پر بھروسہ رکھیں کیونکہ اگر اللہ نے آپ سے کچھ لیا ہے تو وہ اس سے بہتر چیز کے ساتھ آپ کو نوازے گا۔

انسٹاگرام@mawrellous

ماورہ حسین کی جانب سے نوجوان کی یونیورسٹی فیس کی ادائیگی کے اعلان کے بعد انہیں خوب سراہا جارہا ہے اور لوگ ان کے اس اقدام کی تعریف کر رہے ہیں۔ جس خاتون نے ماورہ حسین سے مدد کی درخواست کی تھی وہ شاید اداکارہ کے اس اعلان سے ابھی تک واقف نہیں ہے اس لیے اس نے اردو زبان میں دوبارہ بھی اداکارہ کی پوسٹ پر اپنی درخواست کو  پوسٹ کیا تھا۔ یہ واضح نہیں ہوسکا ہے کہ ماورہ حسین کا مدد کی طالب خاتون سے رابطہ ہوا ہے یا نہیں۔

مزید : تفریح