موصل حملے،امریکانے شہریوں کی ہلاکت کی ذمہ داری قبول کرلی
موصل (صباح نیوز)امریکی فوجی اتحاد نے موصل کے فضائی حملوں میں شہریوں کی ہلاکت کی ذمے داری قبول کر لی ہے۔ اقوام متحدہ نے شہریوں کی ہلاکت پر شدید تشویش کا اظہارکیا ہے۔
امریکی میڈیا کے مطابق امریکی محکمہ دفاع پنٹاگون نے اس بات کا اعتراف کیا ہے کہ موصل پر اتحادی افواج کی بمباری کے نتیجے میں رہائشی عمارتوں کو نقصان پہنچا جس کے نتیجے میں شہریوں کی ہلاکتیں ہوئیں۔
اس حوالے سے مزید تفتیش کی جارہی ہے۔موصل کے مغربی حصے کو داعش سے آزاد کرانے کی جنگ میں حالیہ بمباری کے نتیجے میں دو سو شہریوں کی ہلاکتوں کی اطلاعات ہیں جبکہ عراقی حکام کا کہنا ہے کہ اب تک دو لاکھ سے زائد افراد بے گھر ہوچکے ہیں۔اقوام متحدہ نے فریقین سے اپیل کی ہے کہ شہریوں کے تحفظ کو یقینی بنایا جائے۔