سیدو شریف   ایئرپورٹ کی بحالی ،  وزیراعلی خیبرپختونخوا  بھی مراد سعید کے گن گانے لگے 

سوات(ڈیلی پاکستان آن لائن)  وزیراعلی خیبرپختونخوا محمود خان نے سوات میں سترہ سال بعد فلائٹ آپریشن کی بحالی پر خیبر پختونخوا کے لوگوں کو مبارکباد پیش کرتے ہوئے کہا ایئرپورٹ کی بحالی میں مراد سعید کاکردار قابل ستائش ہے،ہم نے جو وعدے کئے تھے ان کو پورے کرنے کیلئے متحرک ہیں،سیاحت کو فروغ دینا  وزیراعظم کا وژن ہے، صوبے میں ترقیاتی منصوبوں کا جال بچھائیں گے، ہر 15 دن بعد وزیراعظم کو لانا ہے اور منصوبوں کا افتتاح کرانا ہے۔

 سیدو شریف ایئرپورٹ کی افتتاحی تقریب سے خطاب کرتے ہوئےوزیراعلی خیبر پختونخوا نےکہا آج ہم وزیراعظم عمران خان کی کاوشوں کی وجہ سے اکٹھے ہوئے، سول ایوی ایشن،ڈسٹرکٹ ایڈمنسٹریشن،پولیس نے محنت کی، سیدوشریف ایئرپورٹ کی بحالی پر مرادسعید کا کردار قابل ستائش ہے، غلام سرور اور پی آئی اے کا بھی بے حد مشکور ہوں تاہم اس ائیر پورٹ کی بحالی کا پورا کریڈٹ مراد سعید کو جاتا ہے یہ سوات کاسپوت ہے، ہم نے جو وعدے کئے تھے ان کو پورے کرنے کیلئے متحرک ہیں، سیدوشریف ایئرپورٹ جب بند ہواتھا اسوقت سوات کے حالات خراب تھے۔

وزیراعلی خیبر پختونخوا نے کہا کہ سوات،مالاکنڈ کے لوگوں کو مبارکبادپیش کرناچاہتاہوں، سیاحت کو فروغ دینا یہ وزیراعظم کا وژن ہے، صوبے میں ترقیاتی منصوبوں کا جال بچھائیں گے، آسٹریا سے آنیوالا شخص سوات میں چار ہزار گھربناناچاہتاہے، سوات کا علاقہ ایک سرکل میں منسلک ہوجائے گا،سیاحت پر ہماری توجہ ہے،موٹروے کا فیز ون مکمل ہوچکا ہے،دوسرے پر کام جاری ہے، این ایچ اے کا چکدرہ چترال اور شندور کے منصوبے پر کام جاری ہے۔

محمود خان نے کہا کہ بہت سے ترقیاتی منصوبے پائپ لائن میں ہیں، انڈسٹریل ون، مینگورہ سٹی کیلئے صاف پانی کیلئے کام کررہے ہیں جبکہ ورلڈ بینک کی مدد سے   سوات سے مینگورہ کوصاف پانی دیاجائے گا، ہم نے ہر 15 دن بعد وزیراعظم کو لانا ہے اور منصوبوں کا افتتاح کرانا ہے۔ وزیراعلی کے پی نے عوام سے اپیل کی کہ کورونا ایس اوپیز پر سختی سے عمل کریں، کورونا کی وبا ہمارے لئے اللہ کی طرف سے امتحان ہے، میں نہیں چاہتا بچے سکول سے محروم،نوجوان بے روزگار ہو ں، عوام میں آگاہی مہم میں آپ لوگ ساتھ دیں۔