عوام عمران خان سے اس کا مذہب نہیں ، اس کی کارکردگی کا پوچھ رہے ہیں، مریم اورنگزیب
لاہور ( ڈیلی پاکستان آن لائن ) مسلم لیگ (ن) کی ترجمان مریم اورنگزیب نے کہا کہ عوام عمران خان سے اس کی کارکردگی کا پوچھ رہے ہیں ، مذہب کا نہیں ۔
مریم اورنگزیب نے کہا کہ آج مریم اور حمزہ مہنگائی مارچ کی قیادت کریں گے ، مسلم لیگ (ن) کے ورکرز اور افراد مہنگائی مکاؤ مارچ میں شرکت کرینگے ، پاکستان کے عوام کو علم ہونا چاہئے کہ وقت آگیا ہے کہ ساڑھے تین سال ملک کے اندر مہنگائی ، بھوک ، غربت ، تباہی ، آٹا چینی ، دوائی چوری اور کشمیر فروشی کے خلاف یہ مارچ ہے ۔
ترجمان مسلم لیگ (ن) نے کہا کہ وہ شخص جو ساڑھے تین سال عوام سے جھوٹ بولتا رہا ، عوام کو گمراہ کیا ، ساڑھے تین سال فارن فنڈنگ کے ذریعے اور اوورس یز پاکستانیوں کے اربوں روپوں کی منی لانڈرنگ کی ، انہوں نے اپنے ذاتی اکاؤنٹ اور ملازمین کے اکاؤنٹس میں منی لانڈرنگ کرائی ، وہ مدینہ کے نام پر سیاست کے نام کے بعد امربالمعروف اور مذہب کے پیچھے چھپنے کی کوشش کر رہا ہے ، عوام تم سے چوری کے پیسے کا حساب مانگ رہی ہے ، اربوں کی منی لانڈرنگ اور لوٹ مار کا حساب چاہتی ہے ۔
مریم اورنگزیب نے کہا کہ مذہب کے پیچھے چھپنے کی کوشش مت کرو ، روز کھڑے ہو کر سرکاری وسائل استعمال کر کے سیاسی مخالفین کو گالی دیتے ہو ، انتشار اور نفرتیں پھیلاتے ہو ، مذہب کے پیچھے چھپتے ہو ، یہ حق اور سچ کی لڑائی ہے ، عوام حق اور سچ کے ساتھ کھڑی ہو گی ، اپنے روز گار کے ساتھ کھڑے ہوں گے ۔
ترجمان مسلم لیگ (ن) نے کہا کہ یہ مارچ مہنگائی اور قرض کے خلاف ہے ، عمران خان کو اب ساڑھے تین سال بعد مذہب کارڈ استعمال کرنے کی ضرورت نہیں ہے ، عوام ان سے ان کی کارکردگی پوچھ رہی ہے ، کشمیر فروشی کا سوال پوچھ رہی ہے ، مہنگائی کا سوال کررہی ہے ، ترقی 5.8 فیصد سے 0.2 فیصد اور پھر منفی 2 فیصد پر لے گئے، عوام ان کا مذہب نہیں پوچھ رہے ، عوام جانتے ہیں کہ تمہارے پاس ٹرمپ کارڈ گالی ہے جو نوجوانوں کو سکھائی ہے ، یہی نوجوان آپ کے خلاف اٹھ کھڑے ہوئے ہیں کیونکہ نوجوانوں کو روٹی ، روزگار ، حقوق چاہئے ۔