روسی صدر نے چین کے ساتھ فوجی اتحاد سے متعلق اہم بیان دےدیا
ماسکو(ڈیلی پاکستان آن لائن) روس کے صدر ولادیمیر پیوٹن نے کہا ہے کہ چین کے ساتھ تکنیکی شعبے میں تعاون جاری ہے تاہم کوئی فوجی اتحاد نہیں بنا رہے۔
ایک انٹرویو میں روسی صدر نے کہا کہ جو کچھ بھی ہو رہا ہے سب کچھ شفاف انداز میں ہو رہا ہے اس میں کوئی چیز چھپی ہوئی نہیں ہے، مغربی طاقتیں عالمی سطح پر مزید اتحاد بنانے کی کوشش کر رہی ہیں۔
انٹرنیشنل نیوز ایجنسی کے مطابق ولادیمیر پیوٹن نے امریکا اور نیٹو پر نیا اتحاد بنانے کا الزام لگایا ہے،ان کا کہنا ہے کہ نیا اتحاد دوسری جنگ عظیم کے دوران بننے والے جرمنی، اٹلی، جاپان کے فوجی اتحاد سے مماثلت رکھتا ہے۔
یاد رہے کہ رواں ہفتے چین کے صدر شی جن پنگ نے روس کا دورہ کیا تھا۔ جہاں ان کی پیوٹن سے ملاقات ہوئی تھی اور تعلقات کو مزید مضبوط بنانے کا عہد کیا گیا تھا۔
