اسلام آباد(ڈیلی پاکستان آن لائن)الیکشن کمیشن آف پاکستان نے 2022-23کے اثاثوں کے گوشواروں کی تفصیلات جمع نہ کرانے پر 24سابق ارکان اسمبلی کو نااہل قرار دیدیا۔
نجی ٹی وی چینل جیو نیوز کے مطابق 2022-23کے اثاثے اور گوشواروں کی تفصیلات نہ کرانے کے کیس کا الیکشن کمیشن نے فیصلہ جاری کردیا، جاری فیصلے کے مطابق الیکشن کمیشن نے قومی اسمبلی کے 10سابق ارکان کو نااہل قرار دیدیا،سندھ اور بلوچستان اسمبلیوں کے 7،7سابق ممبران بھی نااہل قراردیئے گئے ہیں، فیصلے میں کہا گیا ہے کہ سابق ارکان اسمبلی تفصیلات دینے سے تک عام اور سینیٹ الیکشن میں حصہ نہیں لے سکتے۔مالی سال 2022-23کے اثاثوں کی تفصیلات کے فارم بی دینے تک یہ ارکان نااہل رہیں گے۔
فیصلہ میں سابق ایم این ایز رانا محمد اسحاق خان، کمال الدین ،عصمت اللہ ،ثمینہ مطلوب، نصیبہ، شمیم آرا پنہوراور روبینہ عرفان کو نااہل قرار دیا گیا ہے،
سابق ارکان سندھ اسمبلی ارسلان تاج حسین ،عارف مصطفیٰ جتوئی، عمران علی شاہ،علی غلام اور طاہرہ کو نااہل قرار دیا گیا ہے،
بلوچستان اسمبلی کے سابق رکن میر سکندر علی، میر محمد اکبر، سرداریار رند،عبدالرشید، عبدالواحد صدیقی، میرجمال اور بی بی شاہینہ نااہل ارکان میں شامل ہیں۔