کور کمانڈر ہاؤس پر حملے میں ملوث 16ملزموں کیخلاف فوجی عدالتوں میں کارروائی شروع
لاہور(مانیٹرنگ ڈیسک) 9 مئی کو کور کمانڈر ہاؤس پر حملے میں ملوث ملزموں کیخلاف فوجی عدالتوں میں کارروائی شروع کردی گئی۔انسداد دہشت گردی عدالت لاہور نے عمران خا ن کی گرفتاری کے بعد پرتشدد واقعات میں ملوث 16 ملزموں کو فوج کے حوالے کرنے کا حکم دیدیا، جس کے بعد جناح ہاؤس (کور کمانڈر ہاؤس) لاہور پر حملے میں ملوث ملزمو ں کیخلاف فوجی عدالتوں میں کارروائی شروع ہو گئی۔جناح ہاؤس لاہور میں جلاؤ گھیراؤ اور توڑ پھوڑ کے مقدمے میں ملٹری ایکٹ کے تحت کارروائی کیلئے کمانڈنگ افسر نے 16 ملز مو ں کی حراست طلب کی جسے انسداد دہشت گردی عدالت نے منظور کرتے ہوئے ملزموں کو فوج کے حوالے کرنے کا حکم دیدیا۔عدالت نے سابق رکن صوبائی اسمبلی میاں اکرم عثمان سمیت 16 ملزمان کو کمانڈنگ افسر کے حوالے کرنے کا حکم دیا، کمانڈر افسر کے مطابق ملزمان آفیشل سیکرٹ ایکٹ کے سیکشن 3,7 اور 9 کے تحت قصور وار پائے گئے ہیں، عدالتی فیصلے میں کہا گیا ہے کہ ملزمان کیخلاف آرمی ایکٹ 1952ء کے تحت ٹرائل ہوسکتا ہے۔عدالتی فیصلے کے مطابق پراسیکیوشن نے کمانڈر کی درخواست پر اعتراض نہیں کیا، عدا لت نے حکم دیا سپرنٹنڈنٹ کیمپ جیل 16 ملزمان کو مزید کارروائی کیلئے کمانڈر افسر کے حوالے کردے۔ذرائع کے مطابق 16 ملزمان میں عمار ذوہیب، علی افتخار، علی رضا، محمد ار سلا ن، محمد عمیر، محمد رحیم، ضیا الرحمن، وقاص علی، ریئس احمد، فیصل ارشد، محمد بلال، فہیم حیدر، ارضم جنید، میاں محمد اکرم عثمان، محمد حاشر خان اور حسن شاکر شامل ہیں۔
کارروائی شروع
