25 ستمبر کو پاکستان میں "قومی اخبارات کے قارئین کا دن" کے طور پر منایا گیا

25 ستمبر کو پاکستان میں "قومی اخبارات کے قارئین کا دن" کے طور پر منایا گیا
25 ستمبر کو پاکستان میں

  

لاہور(ڈیلی پاکستان آن لائن)گزشتہ روز 25 ستمبر کو پاکستان میں "قومی اخبارات کے قارئین کا دن" کے طور پر منایا گیا۔ اس موقع پر اخبارات نے خصوصی ضمیمہ شائع کیا تاکہ لوگوں کو اخبارات پڑھنے پر زور دیا جائے۔ اس ضمیمہ میں صدر ، وزیر اعظم ، صوبائی گورنروں اور وزرائے اعلیٰ کے ساتھ ساتھ وفاقی وزیر اطلاعات کا پیغام شامل ہے۔ پاکستان پوسٹ نے اس موقع کی یاد میں خصوصی ڈاک ٹکٹ جاری کیا۔

صدر مملکت ڈاکٹر عارف علوی نے اپنے پیغام میں کہا کہ ہمیں اپنے لوگوں کو پڑھنے کی عادت ڈالنے کے بارے میں حوصلہ افزائی اور تعلیم دینے کی ضرورت ہے کیونکہ یہ قوم کی فکری ترقی میں بہت اہم کردار ادا کرے گی۔ انہوں نے کہا کہ تعلیم نے ان کے روز مرہ کے معمولات میں اہم کردار ادا کیا ۔ انہوں نے اے پی این ایس کی جانب سے "قومی اخبارات کے قارئین کا دن" منانے کی کوششوں کو سراہا اور انہیں اس مقصد کی قیادت کرنے پر مبارکباد دی۔

وزیراعظم عمران خان نے اپنے پیغام میں حکومت پاکستان کی جانب سے قومی اخبارات کے قارئین کا دن منانے کے لیے اے پی این ایس کی کوششوں کو سراہا تاکہ قوم کو اخبار پڑھنے کی اہمیت سے آگاہ کیا جا سکے۔ انہوں نے کہا کہ جعلی خبروں کے بڑے پیمانے پر پھیلاو¿ کے دور میں اخبارات قابل اعتماد اور مستند معلومات کا ذریعہ ہیں۔ ان کا کہنا تھا کہ یہ دیکھنا حوصلہ افزا ہے کہ اخبار نے ڈیجیٹل میڈیا کی آمد کے باوجود اپنی صداقت اور اعتبار کو برقرار رکھا ہے۔

وزیراعظم نے کورونا سے نمٹنے کے لیے حکومت کی مدد کرنے میں اخبارات اور میڈیا کے کردار کی بھی تعریف کی۔ انہوں نے مزید کہا کہ اخبارات نے پاکستان کے موقف کو پوری دنیا میں رکھنے میں بھی مدد کی ہے۔ انہوں نے آزادی اظہار کے فروغ کے لیے اپنی حکومت کے عزم کا اعادہ کیا اور اخبارات پر زور دیا کہ وہ ایک تعلیم یافتہ اور روشن خیال قوم کی ترقی کے لیے حکومت کے ساتھ ہاتھ ملائیں۔

چاروں صوبوں کے گورنروں ، وزرائے اعلیٰ اور وفاقی وزیر اطلاعات نے اے پی این ایس کی پاکستان بھر میں اخباری قارئین کو فروغ دینے اور قارئین کو قابل اعتماد اور مستند خبریں فراہم کرنے میں کردار کی تعریف کی۔25 ستمبر ، اے پی این ایس نے 2019 میں "قومی اخبارات کے قارئین کے دن" کے طور پر وقف کیا تھا۔ اس تاریخ کی اہمیت یہ ہے کہ اس دن دنیا کا پہلا ملٹی پیج ڈیلی اخبار "عوامی واقعات" 1689 میں امریکہ سے شائع ہوا۔اے پی این ایس نے یادگاری ڈاک ٹکٹ جاری کرنے پر پاکستان پوسٹ کا شکریہ ادا کیا اور عوام پر زور دیا کہ وہ نہ صرف یہ ڈاک ٹکٹ استعمال کریں بلکہ اپنے بچوں میں پڑھنے کی عادت بھی ڈالیں۔ اے پی این ایس نے مزید کہا کہ اپنے بچوں کو پڑھنے کی ترغیب دینے کا بہترین طریقہ یہ ہے کہ انہیں اخبارات سے شروع کیا جائے۔ اے پی این ایس نے اس موقع پر ایک اشتہاری مہم بھی چلائی۔

مزید :

قومی -