وزیر اعظم نے عالمی فورمز پر ہمیشہ منظم خطاب کیا،ہمایوں اختر 

وزیر اعظم نے عالمی فورمز پر ہمیشہ منظم خطاب کیا،ہمایوں اختر 

  

لاہور(نمائندہ خصوصی) تحریک انصاف کے سینئر مرکزی رہنما و سابق وفاقی وزیر ہمایوں اختر خان نے کہا ہے کہ وزیر اعظم نے اقوام متحدہ کی جنرل اسمبلی سے ایک مدبر اور ویژن رکھنے والے لیڈر کے طور پر جراتمندانہ اور پراثر خطاب کیا جس کی پوری دنیا ستائش کررہی ہے، وزیراعظم نے اپنے خطاب میں افغانستان کی صورتحال،پاک بھارت تعلقات، مسئلہ کشمیر،اسلامو فوبیا،منی لانڈرنگ اورکورونا وباء  کو موضوع بنا کر صرف مسائل کی نشاندہی نہیں کی بلکہ مذکورہ معاملات کا حل بھی پیش کیا ہے۔

اپنے ایک بیان میں انہوں نے کہا کہ وزیر اعظم عمران خان نے عالمی سطح کے پلیٹ فارمز پر ہمیشہ موثر اور جامع خطاب کر کے دنیا کو یہ سوچنے پرمجبور کیا ہے پاکستان جن حالات اور معاملات کا تذکرہ کر رہا ہے وہ واقعی زیر غور لانے کے قابل اور حل طلب ہیں۔

 اور دنیا کی ترقی اور امن ان سے جڑا ہوا ہے۔ انہوں نے کہاکہ موجودہ دور میں افغانستان کا معاملہ انتہائی اہمیت کا حامل ہے اور وزیر اعظم عمران نے دنیا کو باور کرایا ہے کہ کس طرح پاکستان نے دہشتگردی کے خلاف جنگ میں 80 ہزار جانوں کی قربانی دی اور ہماری معیشت کو 150 ارب ڈالر کا نقصان ہوا، پاکستان میں 35 لاکھ افراد بے گھر ہوئے،آج بھی  لاکھوں افغان پناہ گزین پاکستان میں قیام پذیر ہیں۔ انہوں نے کہاکہ وزیراعظم عمران خان نے انتہائی جرات اوربہادری کے ساتھ بھارت کی بطور ریاست دہشتگردی کو بھی دنیا کے سامنے بے نقاب کیا ہے کیا ماضی میں ایسی کوئی مثال موجود ہے۔ انہوں نے کہا کہ ہمیں حزب اختلاف سے وزیر اعظم کے خطاب پرپر پذیرائی کے کسی سرٹیفکیٹ کی ضرورت نہیں کیونکہ عوام جانتے ہیں کہ وزیر اعظم عمران خان نے پاکستان کا مقدمہ انتہائی دلیری کے سامنے اقوام عالم کے سامنے پیش کیا ہے۔

مزید :

میٹروپولیٹن 4 -