کسی سیاسی رہنما سے رابطہ نہیں،دورہ لندن کو سیاسی رنگ نہ دیا جائے،نگران وزیراعظم انوار الحق کاکڑ
لندن (ڈیلی پاکستان آن لائن)نگران وزیراعظم انوار الحق کاکڑ کا کہنا ہے کہ ان کا کسی سیاسی رہنما سے رابطہ نہیں، ان کے دورہ لندن کو سیاسی رنگ نہ دیا جائے۔
لندن میں میڈیا سے گفتگو کرتے ہوئے ان کا کہنا تھا کہ ان کے دورہ لندن کو سیاسی رنگ دینے کی کوشش نہ کی جائے،ان کے کسی سیاسی جماعت یا رہنما سے رابطے میں کوئی صداقت نہیں، چیئرمین پی ٹی آئی عمران خان کے الیکشن میں حصہ لینے سے متعلق ان کا کہنا تھا کہ الیکشن میں چیئرمین پی ٹی آئی حصہ لیں گے یا نہیں قانون دیکھے گا،یہ سیاسی یا انتظامی نہیں قانونی معاملہ ہے،الیکشن کمیشن اپنی آئینی ذمہ داری پوری کرے گا۔
نواز شریف کی واپسی سے متعلق ان کا کہنا تھا کہ ان کی واپسی پر قانون کے مطابق عمل ہوگا،نگران حکومت کی وابستگی کسی سیاسی جماعت یا گروہ کے ساتھ نہیں،یہ تاثر نہیں دینا چاہتے کہ ہم کسی سیاسی جماعت کے ساتھ ہیں،جو بھی کریں گے پاکستان کے قانون کے مطابق ہوگا،جائزہ لیں گےنواز شریف کو عدالتی اجازت کی قانونی حیثیت کیا ہے۔
غیر معیاری اواٹسین انجکشن کے باعث بینائی متاثرہونے کے حوالے سے ان کا کہنا تھا کہ بینائی متاثر کرنے والے انجکشن مارکیٹ سے اٹھا لیے گئے،نگران وزیرصحت انجکشن کے حوالے سے اقدامات کو دیکھ رہے ہیں.
