ڈیرہ غازی خان (مانیٹرنگ ڈیسک،نیوزایجنسیاں) وزیراعلیٰ پنجاب مریم نواز نے کہاہے جنوبی پنجاب کی لکیر کھینچنے والے ہم میں سے نہیں، پنجاب کے تمام شہروں کو یکساں ترقی کے مواقع فراہم کیے جارہے ہیں۔ڈیرہ غازی خان میں الیکٹرک بسوں کی افتتاعی تقریب سے خطاب کرتے ہوئے وزیراعلیٰ مریم نواز نے کہا میں سینٹرل یا ساؤتھ نہیں پو رے پنجاب کی وزیراعلیٰ ہیں، بار بار پنجاب کا نام لے کر لکیر کھینچنے کی بات کی جارہی ہے، جو جنوبی پنجاب کی بات کرتے ہیں ان کو بھی اقتدار ملا، انہوں نے کچھ نہیں کیا، جو سینٹرل، سا ؤ تھ، نارتھ پنجاب کی بات کرتے ہیں وہ پاکستان کے عوام کے دوست نہیں، ان کو اقتدار چاہیے، دوسرا آج کل ہر کوئی پنجاب پر انگلی اٹھا رہا ہے،میں پنجاب کے عوام کی ذمہ دار ہو ں، پنجاب کی جانب اٹھنے والی انگلی توڑ دوں گی۔وزیراعلیٰ پنجاب مریم نواز نے بلاول بھٹو زرداری کا نام لیے بغیر ان پر تنقید کرتے ہوئے کہا ایک باعزت شخص کہہ رہا ہے حکومت دنیا سے اپیل کیوں نہیں کرتی کہ اللہ کا واسطہ ہمیں پیسے دیدو، مگر انہیں کہنا چاہتی ہوں یہ مشورے اپنے پاس رکھیں اور بینظیر انکم سپورٹ پروگرام کے 10 ہزار روپے سے سیلاب متاثرین کا کچھ نہیں بنے گا۔مریم نوازنے کہا پنجاب میں تاریخ کا بدترین سیلاب آیا، 4 ماہ سے مسلسل بارشیں ہورہی ہیں، پیپلزپارٹی ہماری اتحادی ہے لیکن افسوس کیساتھ کہنا پڑتا ہے، انہوں نے پنجاب میں سیلاب کے معاملے پر سیاست کی، صدر آصف زرداری میرے بڑے اور بلاول میرے چھوٹے بھائی ہیں، سندھ میں کوئی آفت آتی ہے تو پنجاب ساتھ کھڑا ہوتاہے، سندھ کا کیا حال ہے، ابھی اس پر بات نہیں کرنا چاہتی، پنجاب میں سیلاب آیا ہے تو بات ہورہی ہے کہ بینظیر انکم سپورٹ پروگرام کے ذریعے امداد دی جائے، سیلاب متاثرین کیلئے بی آئی ایس پی کے 10ہزار روپے سے کچھ نہیں بنے گا، مریم نواز نے سیلاب متاثرین کو 10 ہزار روپے نہیں دینے بلکہ ان کو 10 لاکھ روپے دینے ہیں۔مریم نواز نے کہا روز مفت مشورے آرہے ہیں کہ دنیا سے امداد کیوں نہیں مانگ رہے، کیوں دنیا کے آگے ہاتھ نہیں پھیلارہے، میں نوازشریف کی بیٹی ہوں، امداد کیلئے ہاتھ نہیں پھیلا ؤ ں گی، کوئی خود دار شخص کیسے کسی کے آگے ہاتھ پھیلاسکتا ہے، ہم کب تک دوسروں کیسامنے ہاتھ پھیلاتے رہے ہیں۔انہوں نے کہا بہت ہی آسان حل نکالا ہے کہ بینظیر انکم سپورٹ پروگرام کے ذریعے لوگوں کو 5،5 یا 10،10 ہزار روپے دیدو، جس کا لاکھوں کا نقصان ہوگیا جن کے گھر گرگئے، جن کی فصلیں تباہ ہوگئیں ان کا اس 10 ہزار سے کیا ہوگا، میں سب کے گھر تعمیر کرنا چاہتی ہوں۔انہوں نے کہا میرے 3 بچے جنید، مہرالنسا اور ماہ نور ہیں، سینٹرل پنجاب میرے لیے ماہ نور، نارتھ پنجاب میرے لیے مہرالنسا اور ساؤتھ پنجاب میرے لیے جنید ہے، جیسے ایک ماں اپنے بچوں میں تفریق نہیں کرتی اسی طرح میں اپنے صوبے کے عوام میں فرق نہیں کرسکتی۔
مریم نواز