پی سی بی کی ویسٹ انڈیز کو یو اے ای میں ڈے نائٹ ٹیسٹ میچ کی تجویز

پی سی بی کی ویسٹ انڈیز کو یو اے ای میں ڈے نائٹ ٹیسٹ میچ کی تجویز

 لاہور(سپورٹس رپورٹر)پاکستان کرکٹ بورڈ نے ویسٹ انڈیز کو اس سال متحدہ عرب امارات میں ایک ڈے نائٹ ٹیسٹ میچ کھیلنے کی تجویز دی ہے۔ویسٹ انڈیز کی ٹیم اکتوبر میں متحدہ عرب امارات میں پاکستان سے سیریز کھیلنے والی ہے جس میں دو ٹیسٹ پانچ ون ڈے اور دو ٹی ٹوئنٹی انٹرنیشنل شامل ہیں۔واضح رہے کہ پاکستانی کرکٹ ٹیم اس سال آسٹریلیا کے دورے میں برسبین میں ڈے نائٹ ٹیسٹ میچ کھیلے گی اور پاکستان کرکٹ بورڈ کی خواہش ہے کہ آسٹریلوی دورے سے قبل اسے ایک اور ڈے نائٹ ٹیسٹ کھیلنے کا موقع مل جائے۔ویسٹ انڈین کرکٹ بورڈ اس سے قبل پاکستان کرکٹ بورڈ کی دو ٹی ٹوئنٹی انٹرنیشنل میچز پاکستان میں کھیلنے کی تجویز مسترد کرچکا ہے۔گذشتہ سال ایڈیلیڈ میں آسٹریلیا اور نیوزی لینڈ کے درمیان ڈے نائٹ ٹیسٹ میچ کی کامیابی کے بعد متعدد کرکٹ بورڈز نے ڈے نائٹ ٹیسٹ میچ کو بین الاقوامی کرکٹ میں ایک اچھے اضافے کے طور پر دیکھتے ہوئے اس میں دلچسپی ظاہر کی ہے۔دلچسپ بات یہ ہے کہ پاکستان کرکٹ بورڈ نے دو ہزار تیرہ میں سری لنکا کو بھی متحدہ عرب امارات میں ڈے نائٹ ٹیسٹ میچ کھیلنے کی تجویز دی تھی جس سے اس نے اتفاق نہیں کیا تھا۔

مزید : کھیل اور کھلاڑی

لائیو ٹی وی نشریات دیکھنے کے لیے ویب سائٹ پر ”لائیو ٹی وی “ کے آپشن یا یہاں کلک کریں۔


loading...