کورونا کے کاری وار، پاکستان میں 288 افراد جاں بحق، کیسز کی تعداد 13 ہزار 528 ہوگئی

کورونا کے کاری وار، پاکستان میں 288 افراد جاں بحق، کیسز کی تعداد 13 ہزار 528 ہوگئی
کورونا کے کاری وار، پاکستان میں 288 افراد جاں بحق، کیسز کی تعداد 13 ہزار 528 ہوگئی

  

اسلام آباد (ڈیلی پاکستان آن لائن) کورونا کی تباہ کاریوں کا سلسلہ جاری ہے، پاکستان میں کورونا کے مریضوں کی تعداد 13 ہزار 528 اور جاں بحق افراد کی تعداد 288 ہوگئی ہے۔

نیشنل کمانڈ اینڈ کنٹرول سنٹر کے مطابق پاکستان میں کورونا کے کیسز میں 200 کا اضافہ ہوا ہے جس کے بعد کورونا سے متاثرہ مریضوں کی مجموعی تعداد 13 ہزار 528 ہوگئی ہے۔ پیر کے روز کورونا کی وجہ سے پاکستان میں 7 افراد جان کی بازی ہارے ہیں جس کی وجہ سے جاں بحق افراد کی تعداد 288 ہوگئی ہے۔ ملک بھر میں اب تک 3 ہزار 29 مریض کورونا سے جان چھڑانے میں کامیاب ہوئے ہیں۔  ایک دن میں کیے گئے ٹیسٹوں کی تعداد 6 ہزار 391 ہے  اور اب تک کیے گئے مجموعی ٹیسٹوں کی تعداد ایک لاکھ 50 ہزار 756 ہوگئی ہے۔

صوبوں کی صورتحال

سب سے بڑی آبادی کا صوبہ پنجاب کورونا سے سب سے زیادہ متاثر ہوا ہے  جہاں کورونا وائرس کے مریضوں کی تعداد 5 ہزار 526 ہوگئی ہے۔ سندھ میں کورونا کے مریضوں کی تعداد 4 ہزار 615، خیبر پختونخوا میں ایک ہزار 984، بلوچستان میں 781، گلگت بلتستان میں 318، اسلام آباد میں 245 اور آزاد جموں و کشمیر میں مریضوں کی تعداد 59 ہوگئی ہے۔

عالمی صورتحال

کورونا وائرس نے پیر کے روز ایک اور اہم ترین سنگ میل عبور کرلیا ہے۔ پیر کے روز دنیا بھر میں کورونا کے مریضوں کی تعداد 30 لاکھ 16 ہزار 864 ہوگئی ہے۔  اب تک کورونا کی وجہ سے دنیا بھر میں 2 لاکھ 7 ہزار 981 افراد ہلاک ہوچکے ہیں۔ 8 لاکھ 88 ہزار 634 لوگ کورونا وائرس سے صحتیاب ہوئے ہیں۔

سب سے متاثرہ ممالک

دنیا میں کورونا وائرس سے سب سے زیادہ متاثرامریکہ ہوا ہے جہاں مریضوں کی تعداد 9 لاکھ 88 ہزار 932 ہوگئی ہے۔ سپین میں کورونا کے مریضوں کی تعداد 2 لاکھ 29 ہزار 422، اٹلی میں ایک لاکھ 97 ہزار 675، فرانس میں ایک لاکھ 62 ہزار 100، جرمنی میں ایک لاکھ 58 ہزار 142، برطانیہ میں ایک لاکھ 52 ہزار 840 اور ترکی میں کورونا کے مریضوں کی تعداد ایک لاکھ 10 ہزار 130 ہوگئی ہے۔

سب سے زیادہ ہلاکتیں کہاں ہوئیں؟

کورونا وائرس کی وجہ سے سب سے زیادہ ہلاکتیں امریکہ میں ہوئی ہیں جہاں اس وبا کا شکار بننے والوں کی تعداد 55 ہزار 462 ہوگئی ہے۔ اٹلی میں اب تک یہ وبا 26 ہزار 644 قیمتی انسانی زندگیاں نگل چکی ہے۔ سپین میں کورونا کی وجہ سے مرنے والوں کی تعداد 23 ہزار 521 ہوگئی ہے۔کورونا وائرس کی وجہ سے فرانس میں 22 ہزار 856 اور برطانیہ میں 20 ہزار 732 ہلاکتیں ہوئی ہیں۔

مزید :

اہم خبریں -قومی -علاقائی -اسلام آباد -کورونا وائرس -