فلم کو صنعت کا درجہ دینے کی ضرورت ہے، جاوید شیخ

  فلم کو صنعت کا درجہ دینے کی ضرورت ہے، جاوید شیخ

  

 لاہور (فلم رپورٹر)سینئر اداکار جاوید شیخ نے کہا ہے کہ فلم کو صنعت کا درجہ دینے کیلئے صرف اعلانات کافی نہیں بلکہ عملی اقداما ت بھی نا گزیر ہیں،اس کے لئے جامع اور موثر پالیسی بنائی جائے اور پھر سب کو اس پالیسی پر پہرہ دینا ہوگا۔ایک انٹر ویو میں انہوں نے کہا کہ فلم انڈسٹری کے لئے ایسی پالیسی تشکیل پانی چاہیے تاکہ ملک میں جوبھی حکومتیں آئیں سیاست اس پالیسی پر اثر انداز نہ ہو،کامیاب ممالک کو دیکھتے ہوئے اپنی ثقافت میں رہتے ہوئے ان کے تجربات سے استفادہ کرنا چاہیے۔ پالیسی کی کامیابی کیلئے شوبز انڈسٹری کے سنجیدہ اور سینئر لوگوں سے مشاورت کو ترجیح دی جانی چاہیے۔ انہوں نے کہا کہ فلم فنانس فنڈ، نیشنل فلم اکیڈمی، فلم اسٹوڈیوز کا قیام، فلم ڈائریکٹوریٹ اور پبلی کیشن کی بحالی، فلم بینی کے آلات کی درآمد، فلم سنسر فیس اور سیلز ٹیکس میں چھوٹ اور قومی تہواروں پر صرف پاکستانی فلموں کی نمائش جیسے اقدامات پالیسی کا حصہ ہونے چاہئیں مزید کہا کہ نئے اداکار بہت معیاری کام کررہے ہیں پڑھے لکھے لوگوں کا شوبز کی جانب آنا بہت خوش آئند بات ہے۔

مزید :

کلچر -