وفاقی حکومت نے عمران خان کے گھر سے پولیس سیکیورٹی ہٹا لی
اسلام آباد (ڈیلی پاکستان آن لائن)سابق وزیر اعظم اور چیئر مین پاکستان تحریک انصاف عمران خان کی بنی گالہ رہائش گاہ سے پولیس سکیورٹی ہٹالی گئی ہے ۔
تفصیلات کے مطابق پاکستان تحریک انصاف کے رہنماؤں نے سابق وزیراعظم عمران خان سے ذاتی سکیورٹی واپس لیے جانے کا دعویٰ کیا ہے، پی ٹی آئی رہنما اور نامور گلوکار سلمان احمد نے سوشل میڈیا پر جاری بیان میں لکھا کہ فاشسٹ پولیس نے ابھی کنفرم کیا ہے کہ ظالم رانا (وزیر داخلہ رانا ثنا اللہ) کی ہدایات پر سابق وزیراعظم عمران خان سے ذاتی سیکیورٹی واپس لے لی گئی ہے۔
انہوں نے مزید لکھا کہ سیکیورٹی تھریٹس کے بارے میں معلوم ہونے اور 3 نومبر کو ہونے والے قاتلانہ حملے کے باوجود عمران خان سے قانونی طور پر لی گئی سیکیورٹی واپس لے لی گئی، اگر عمران خان کو کچھ ہوا تو اس کے ذمہ دار وزیر داخلہ رانا ثنا اللہ ہوں گے
Fascist Police just confirmed instructions given by Rana Massacre to withdraw Personal security of fmr PM @ImranKhanPTI to which he is legally entitled .knowing the security threats & a Nov 3 failed assassination attempt on his life. RANA will b responsible.
— salman ahmad (@sufisal) January 27, 2023
دوسری جانب سابق وفاقی وزیر مراد سعید نے بھی اپنے پیغام میں کہا کہ عمران خان کی سیکیورٹی ہٹا کر کیا پیغام دینا چاہتے ہو، زرداری اور دیگر لوگ پیسہ دے کر عمران خان کو قتل کرانا چاہتے ہیں،مراد سعید کا کہنا تھا فواد چودھری سے جو رویہ اختیار کیا گیا وہ کس ملک میں ہوتا ہے، بنی گالہ اور عمران خان سے سیکیورٹی واپس لی جا رہی ہے۔
عمران خان کی سکیورٹی کے حوالے سے اسلام آباد پولیس کا بیان بھی سامنے آیا ہے جس میں انہوں نے بتایا ہے کہ بنی گالہ سابق وزیراعظم کی نجی رہائش گاہ ہے، سابق وزیراعظم کئی ماہ سے اسلام آباد میں مقیم نہیں ہیں، ان کی غیر موجودگی میں اسلام آباد پولیس یا دیگر صوبوں کی پولیس نہیں لگائی جا سکتی۔
اسلام آباد میں سابق وزیراعظم کی نجی رہائش گاہ کی سیکیورٹی کا معاملہ۔
بنی گالہ میں سابق وزیراعظم کی نجی رہائش گاہ ہے۔
سابق وزیراعظم پچھلے کئی ماہ سے اسلام آباد میں مقیم نہ ہیں۔
ان کی غیر موجودگی میں اسلام آباد پولیس یا دیگر صوبوں کی پولیس نہیں لگائی جا سکتی۔#ICTP
— Islamabad Police (@ICT_Police) January 27, 2023
ذرائع کے مطابق عمران خان کی بنی گالہ والی رہائش گاہ اسلام آباد پولیس کے ڈی ایس پی سمیت 70 اہلکار تعینات تھے جو مختلف شفٹوں میں ڈیوٹی سرانجام دیتے تھے۔
