مسلم لیگ ن نے اگست میں قومی کانفرنس بلانے کا اعلان کردیا

لاہور(اے پی اے‘ ثنا نیوز‘ این این آئی ) مسلم لیگ (ن) نے اگست میں قومی کانفرنس بلانے کا اعلان کر دیا۔ میاں نواز شریف نے کہا ہے کہ سیاسی جماعتوں کو شرکت کی دعوت دی جائیگی، نثار نے کہا کہ 342 اراکین کے ایوان میں اپوزیشن کے 90 ارکان اس قانون سازی کو کیسے روک سکتے تھے۔ انہوں نے کہا کہ کیا ہم بل وزراءکے ہاتھ سے چھین کر پھاڑ دیتے ، انہوں نے کہا کہ بہتر ہوتا اگر معزز جج صاحبان یہ بتاتے کہ اپوزیشن نے غلطی کہاں کی ہے۔ انہوں نے کہا کہ توہین عدالت بل کی منظوری کے دوران اپوزیشن ارکان تقریریں کرتے رہے، چیختے چلاتے رہے جمہوری ادوار میں احتجاج کا یہ انتہائی طریقہ ہوتا ہے، انہوں نے کہا کہ کیا اپوزیشن ہاتھوں میں ڈنڈے لیکر ایوان جاتی اور بل کی حمایت کرنیوالوں کو ڈنڈے کے زور پر ایسا کرنے سے روکتی، چودھری نثار علی خان نے کہا کہ توہین عدالت بل کی منظوری کے دوران اپوزیشن نے حقیقی جمہوری اپوزیشن کا کردار ادا کیا اور اس سے زیادہ کچھ کرنا جمہوری اور پارلیمانی روایات کی کھلی خلاف ورزی ہوتی ہے۔