حکومت اداروں کے پیچھے چھپنے کی روایت قائم نہ کرے،خورشیدشاہ

حکومت اداروں کے پیچھے چھپنے کی روایت قائم نہ کرے،خورشیدشاہ

سکھر(اے این این ) قومی اسمبلی میں قائد حزب اختلاف اور پیپلز پارٹی کے سینئر رہنما ءسید خورشید شاہ نے کہا ہے کہ اسلام آباد کو فوج کے حوالے کرنے کا فیصلہ درست نہیں اور حکومت کو اداروں کے پیچھے چھپنے کی روایت قائم نہیں کرنی چاہیے۔سکھر میں میڈیا سے بات چیت کرتے ہوئے سید خورشید شاہ نے کہا کہ احتجاج کرنا سب کا حق ہے اس لئے حکومت کو احتجاج پر پابندی نہیں لگانی چایے لیکن اگر کسی کے احتجاج سے مسائل اور نقصانات ہوتے ہیں تو اس کا تدارک کرنا چاہئے۔ انہوں نے کہا کہ یہ ٹھیک ہے کہ ملک حالت جنگ میں ہے لیکن کوئی غیر یقینی صورتحال نہیں ہے اور قوم بھی انتشار کی سیاست کو مسترد کرچکی ہے اس لئے حکومت کو چاہئے کہ وہ سیاسی لوگوں سے بات چیت کرنے کی اچھی روایت قائم کرے۔ انہوں نے کہا کہ تحریک انصاف کے مارچ کی وجہ سے اسلام آباد کو فوج کے حوالے کرنے کا فیصلہ ٹھیک نہیں، حکومت کو ایسے کمزور فیصلے نہیں کرنے چاہیئں جس کے نتائج اچھے نہ ہوں۔ انہوں نے کہا کہ جمہوری حکومتوں کا کسی ادارے کے پیچھے چھپنا اچھی روایت نہیں اور میں نہیں سمجھتا کہ وزیر داخلہ چوہدری نثار نے یہ فیصلہ وزیر اعظم نواز شریف سے پوچھ کر کیا ہوگا۔

مزید : صفحہ اول