الخدمت فاؤنڈیشن کا عبدالستار ایدھی کو خراجِ عقیدت پیش کرنے کیلئے تعزیتی ریفرنس
لاہور(پ ر)الخدمت فاؤنڈیشن کے زیر اہتمام ایدھی فاؤنڈیشن کے بانی عبدالستار ایدھی کو شاندار الفاظ میں خراج عقیدت پیش کرنے کے لئے اُن کہ یاد میں تعزیتی ریفرنس کا انعقاد کیا گیا۔ جس کی صدار ت الخدمت فاؤنڈیشن پاکستان کے مرکزی صدر محمد عبدالشکور نے کی جبکہ دیگر مہمانان میں اخوت کے چیئر مین ڈاکٹر محمد امجد ثاقب، فاؤنٹین ہاؤس کی چیئر مین جسٹس ناصرہ اقبال،ہیومن رائٹس سوسائٹی پاکستان کے چیئرمین ایس ایم ظفر،سندس فاؤنڈیشن کے کنوینیئر منو بھائی ،ہیلپنگ ہینڈ فار ریلیف اینڈ ڈویلپمنٹ کے کنٹری ڈائریکٹر فضل الرحمن، کسٹمز ہیلتھ کیئر سوسائٹی ڈاکٹر آصف محمود جاہ،غزالی ایجوکیشن ٹرسٹ کے ایگزیکٹو ڈائریکٹر سید عامر محمود جعفری ، الخدمت فاؤنڈیشن پاکستان کے سینئر نائب سید احسان اللہ وقاص اورسیکرٹری جنرل ڈاکٹر مشتاق مانگٹ سمیت لاہور کی دیگر فلاحی اداروں کے نمائندگان اور زندگی کے مختلف شعبہ جات سے تعلق رکھنے والے خواتین و حضرات نے شرکت کی۔شرکاء نے ایدھی مشترکہ اعلامیہ بھی پڑھا اور عہد کیا کہ وہ بلا تعصب رنگ و نسل،زبان، علاقہ اور مذہب نیک نیتی سے انسانیت کی خدمت کا مشن جای رکھیں گے۔
اور اِس ورثہ کو آئندہ نسلوں تک منتقل کریں گے۔ کسی صلے، منصب ، مالی مفاد اور سماجی مقام کی لالچ کئے بغیر خالصتاََ انسانیت کی خدمت کے جذبے کو فروغ دیں گے۔ ایدھی کی طرح ذاتی زندگی میں سادگی اختیار کریں گے ۔معیار زندگی کو اعتدال پر لائیں گے اورجو وسائل بچیں گے انہیں حق داروں تک پہنچا ئیں گے۔ فلاحی اداروں میں دفاتر اور اخراجات چکا چوند کی بجائے عبد الستار ایدھی کی طرح سادگی کا کلچر پروان چڑھائیں گے۔انسانی خدمات اور سماجی سرگرمیوں کے دوران عاجزی، انکساری اور خاکساری کا طرز عمل اختیار کریں گے۔زندگی میں بناوٹ کو ترک کرکے خالص بنائیں گے ۔دیانت، امانت اور بے لاگ خدمت کا طرز عمل اختیار کریں گے ۔نفس پر قابو پائیں گیاور خدمت انسانی کے لئے مستقل مزاجی کو فروغ دیں گے ۔مقررین نے اِس موقع پر کہا کہ ایدھی دکھی انسانیت کی خدمت کا استعارہ ہیں اور ہم ان کے نقش قدم پر چلتے ہوئے خدمت انسانی کا مشن جاری رکھیں گے۔ایدھی نے ساری زندگی ستائش اور صلے کی پرواہ کئے بغیر چھ دہائیوں سے زیادہ عرصہ خود کو انسانیت کی خدمت کے لئے وقف کئے رکھا۔ آج ایدھی صاحب دنیا میں نہیں ہیں مگر وہ ہزاروں افراد کے دل میں بے لوث خدمت خلق کا جذبہ جگا گئے ہیں ۔پروگرام کے آخر میں ایدھی کے درجات کی بلندی کے لئے دعا کی گئی۔
