عید الاضحی کے بعد حکومت کیخلاف فیصلہ کن تحریک کا آغاز کیا جائیگا: مولانا عطاء الرحمن

  عید الاضحی کے بعد حکومت کیخلاف فیصلہ کن تحریک کا آغاز کیا جائیگا: مولانا ...

  

پشاور(سٹاف رپورٹر)جمعیت علماء اسلام کے صوبائی امیر سینیٹر مولانا عطا الرحمان نے کہاہے کہ عید الاضحی کے بعد حکومت کے خلاف فیصلہ کن تحریک کا آغاز کیا جائے گا۔سلیکٹیڈ حکمرانوں نے دو سال میں ملک کو تباہی کے کنارے پر کھڑا کر دیا۔ملکی معیشت اور اقتصادی بدحالی نے تحریک انصا ف کا ایجنڈا واضح کر دیا ہے۔کارکن انتخابات کے لئے تیاریوں میں تیز ی لائیں۔وہ ضلع مردان کے دورے کے موقع پر مجلس عاملہ کے اجلاس سے خطاب کررہے تھے۔اجلاس کی صدارت ضلعی امیر مولانا محمد قاسم نے کی جبکہ دیگر مقررین میں صوبائی جنرل سیکرٹری مولانا عطا الحق درویش،سیکرٹری اطلاعات حاجی عبد الجلیل جان،ڈپٹی جنرل سیکرٹری مولانا امان اللہ حقانی،ضلعی جنر ل سیکرٹری مولانا امانت شاہ حقانی،مفتی سلیم حلیمی،مولانا قیصر الدین شامل تھے۔مقررین نے کہاکہ حکمران جماعت کے غیر سنجیدہ اقدامات نے سات سال صوبہ خیبر پختونخوا اور دو سال میں مرکز کو اقتصادی طور پر تباہ کر دیا ہے۔حکومت کے پاس سرکاری ملازمین کی تنخواہوں کے لئے بھی فنڈز موجود نہیں ہے۔مافیاز کو ہر قسم کی چھوٹ دیدی گئی ہے اور وہ بھی دونوں ہاتھوں سے غریب عوام کی چمڑی ادھیڑ رہے ہیں۔انہوں نے کہاکہ کرپشن ختم کرنے والوں نے کرپشن کے ریکارڈ توڑ دیے۔عمران خان جب بھی کسی چیز کا نوٹس لیتے ہیں تو اگلے دن اسکی قیمت میں مزید اضافہ ہو جاتا ہے۔انہوں نے کہاکہ اشیاء خور د ونوش کی قیمتیں آسمان سے باتیں کررہی ہے اور حکمرانوں نے اس پر چھپ سادھ لی ہے۔آٹا اور چینی سمیت دالوں اور سبزیوں کی قیمتیں ریکارڈ سطح تک پہنچ گئی ہے اور کوئی پو چھنے والا نہیں ہے۔انہوں نے کہاکہ عوام کو حکومت کے خلاف نکالنا ہو گا۔حکومت جس سمت میں جارہی ہے تو اس سے اندازہ لگایا جاسکتاہے کہ ایک سال بعد پاکستان معاشی لحاظ سے دنیا کاکمزور ترین ملک ہوگا اور کوئی بھی ملک قرضہ نہیں دے گا اور عوام اپنا خون بھیجنے پر مجبور ہونگے۔انہوں نے کہاکہ عید الاضحی کے بعد ملک گیر تحریک میں مزید تیزی لائی جائے گی۔انہوں نے کہاکہ جمعیت علماء اسلام کے شاندار اور موثر کردار کی وجہ سے عوام کا رخ جمعیت علماء اسلام کی طرف بڑھ رہا ہے۔انہوں نے کارکنوں اور جماعتی ذمہ داران کو ہدایت کرتے ہوئے کہاکہ وہ بلدیاتی انتخابات کے لئے ویلج و نائبرڈ ہو ڈ کونسلوں میں انقلابی جدوجہد کا آغاز کریں اور پارٹی کا پیغام گھر گھر تک پہنچائیں۔

مقامی اخبار کی نشان دہی کے

مزید :

پشاورصفحہ آخر -