کسی کا نہیں مخلوق خدا کے ٹکٹ کا محتاج ہوں، چودھری نثار

کسی کا نہیں مخلوق خدا کے ٹکٹ کا محتاج ہوں، چودھری نثار

راولپنڈی (این این آئی)سابق وزیر داخلہ چودھری نثار علی خان نے کہا ہے کہ میں کسی کے ٹکٹ کا نہیں مخلوق خدا کے ٹکٹ کا محتاج ہوں، نواز شریف کیساتھ یاجوج ماجوج کچھ بولیں گے تو جواب دونگا،میرا مخالف کام کچھ نہیں کرتا آستینیں چڑھا کر ووٹ مانگنے نکل آتا ہے۔ ٹیکسلا کے حلقے میں جلسے سے خطاب کرتے ہوئے سابق وفاقی وزیر داخلہ چودھری نثار علی خان نے کہا کہ میرا مخالف آج پی ٹی آئی میں ہو کر بڑے بڑے دعوے کرتا ہے۔ وہ کبھی پیپلز پارٹی اور کبھی مشرف کا لبادہ اوڑھ کر میرے مقابلے میں آیا۔ چودھری نثار علی خان نے کہا کہ ٹیکسلا کے دوستو آپ نے آج اتنی بڑی تعداد میں جمع ہو کر میرا دل خوش کردیا ہے۔ ٹیکسلا کے لوگو آپ نے دل خوش نہیں کیا بلکہ میرا ایمان تازہ کردیا ہے۔ چودھری نثار علی خان نے جلسے میں شریک لوگوں کا شکریہ ادا کرتے ہوئے کہا کہ ٹیکسلا کے لوگو آپ نے ثابت کیا کہ ٹیکسلا وفاداروں کا علاقہ ہے۔ انہوں نے کہا کہ ٹیکسلا تاریخی اور دینی شہر ہے بڑے بڑے عالم ٹیکسلا میں پیدا ہوئے۔ چودھری نثار علی خان نے کہا کہ 1985ء میں تین لوگوں نے ٹیکسلا شہر میں میرا تعارف کروایا وہ تینوں دینی شخصیات تھیں ۔ سابق وزیر داخلہ نے کہا کہ میرے مقابلے میں کوئی ووٹ لینا چاہتا ہے تو کارکردگی دکھائے میرے مقابل اپنا کوئی ایک میگا پراجیکٹ دکھا دیں۔ چودھری نثار علی خان نے کہا کہ لوگ کردار، کارکردگی اورخدمت کی بنیاد پر ووٹ دیتے ہیں میرا مخالف کام کچھ نہیں کرتا آستینیں چڑھا کر ووٹ مانگنے نکل آتا ہے۔ نواز شریف کے حوالے سے بات چیت کرتے ہوئے چودھری نثار علی خان نے کہا کہ نواز شریف کیساتھ یاجوج ماجوج کچھ بولیں گے تو جواب دونگا۔ انہوں نے کہا کہ میں نواز شریف سے پوچھتا ہوں کہ میں نے تمہارے ساتھ کون سا جرم کیا؟۔ سابق وزیر داخلہ نے کہا کہ میرا پی ٹی آئی، مسلم لیگ (ن) اور کسی پارٹی سے کوئی رابطہ نہیں ہے۔

مزید : ملتان صفحہ اول