پنجاب ایگریکلچر، فوڈ اینڈ ڈرگ اتھارٹی منصوبہ فعال کرنے کا فیصلہ

پنجاب ایگریکلچر، فوڈ اینڈ ڈرگ اتھارٹی منصوبہ فعال کرنے کا فیصلہ
 پنجاب ایگریکلچر، فوڈ اینڈ ڈرگ اتھارٹی منصوبہ فعال کرنے کا فیصلہ

  

 لاہور (ڈیلی پاکستان آن لائن ) وزیراعلی پنجاب حمزہ شہباز نے پنجاب ایگریکلچر، فوڈ اینڈ ڈرگ اتھارٹی کا منصوبہ رواں سال فعال کرنے کی ہدایت کر دی۔

نجی ٹی وی دنیا نیوز کے مطابق وزیر اعلٰی پنجاب حمزہ شہباز نے پراجیکٹ کو مکمل اور فنکشنل کرنے کے نظرثانی شدہ پلان کی منظوری دیتے ہوئے کہا کہ سابق حکومت نے ساڑھے 3برس ضائع کئے جس سے پراجیکٹ کی لاگت میں 3ارب روپے کا اضافہ ہوا، سابق حکمرانوں نے مجرمانہ غفلت کا مظاہرہ کرکے قومی وسائل سے کھلواڑ کیا، نااہلی کے باعث نہ صرف منصوبے کی لاگت میں اضافہ ہوا بلکہ قومی وسائل کو بھی نقصان پہنچا۔

حمزہ شہباز نے مزید کہا کہ لیبز کے لئے ضروری مشیزی اور آلات کی خریداری کے کام میں مزید تاخیر نہیں ہونی چاہیےاور ہیومن ریسورس کی بھرتی کا عمل بھی جلد شروع کیا جائے۔ وزیراعلی پنجاب نے بھرتی کے لئے سٹیئرنگ کمیٹی تشکیل دینے اور عمارت کے اطراف درخت اور پودے لگانے کی بھی ہدایت کی۔

انہوں نے کہا کہ منصوبے کو اکتوبر تک فعال کرنے کے لئے پوری کوشش کی جائے،ہر 15 روز بعد میں خود پراجیکٹ پر ہونے والی پیشرفت کا جائزہ لوں گا۔

وزیراعلی کی زیر صدارت اعلی سطحی اجلاس میں ایڈیشنل چیف سیکرٹری، چیئرمین منصوبہ بندی و ترقیات، پرنسپل سیکرٹری وزیراعلیٰ، سیکرٹری تعمیرات و مواصلات، چیف ایگزیکٹو آفیسر انفراسٹرکچر ڈویلپمنٹ اتھارٹی پنجاب اور متعلقہ حکام نے شرکت کی۔ سیکرٹری تعمیرات و مواصلات نے منصوبے کے نظرثانی شدہ پلان کے بارے میں بریفنگ دی۔

مزید :

قومی -علاقائی -پنجاب -