کھمبے سے کرنٹ لگنے اور نالے میں گرنے سے 2 افراد جاں بحق

کراچی(اسٹاف رپورٹر)ڈیفنس کے علاقے بڑا بخاری کے قریب کرنٹ لگنے 16 سالہ کرشن ہلاک ہوگیا۔اس کی لاش جناح اسپتال لے جائی گئی۔ پولیس کے مطابق نوجوان ابراہیم حیدری کا رہائشی ہے جو کہ دوستوں کے ہمراہ آیا ہوا تھا اور اس کے کپڑے گیلے تھے۔اسے فٹ پاتھ پر لگے ہوئے بجلی کے کھمبے کی وائرنگ سے کرنٹ لگا تاہم پولیس مزید تحقیقات کر رہی ہے۔دوسری جانب شیرشاہ پنکھا ہوٹل کے قریب نالے میں گر کر 22 سالہ نوجوان جاں بحق ہوگیا۔متوفی کے پاس سے ایسی کوئی چیز نہیں ملی جس سے اس کی شناخت کی جا سکے۔ ترجمان چھیپا کے مطابق علاقے سے گزرنے والے کچھ لڑکوں نے فون کر کے ایک شخص کے نالے میں گرنے کی اطلاع دی تھی۔چھیپا کے رضا کاروں نے موقع پر پہنچ کر نالے میں گرنے والے شخص کو نکال کر فوری طور پر اسپتال منتقل کیا جہاں ڈاکٹروں نے اس کی موت کی تصدیق کر دی۔