عمران خان لہجہ نرم رکھیں ،یہ وقت اپوزیشن پر تنقید کیلئے مناسب نہیں ،اعتزاز

عمران خان لہجہ نرم رکھیں ،یہ وقت اپوزیشن پر تنقید کیلئے مناسب نہیں ،اعتزاز

اسلام آباد(اے این این) سینٹ میں قائد حزب اختلاف اور پیپلز پارٹی کے رہنما اعتزاز احسن نے تحریک انصاف کے سربراہ عمران خان کو لہجہ تھوڑا نرم رکھنے کا مشورہ دیتے ہوئے کہا ہے کہ یہ وقت اپوزیشن قائدین پر تنقید کیلئے مناسب نہیں،حکومت پانامہ سے متعلق ہمارا بل منظور کر لے تو تمام پریشانیاں ختم ہو سکتی ہیں ،ضرورت پڑی تو متحدہ اپوزیشن کا اجلاس طلب کیا جائے گا،عمران، قادری اور حکومت کی کیا کشمکش ہوتی ہے، اس پر بات نہیں کروں گا،سب کو پتا ہے حکومت کو کب ہماری یاد آتی ہے۔ان خیالات کا اظہار انھوں نے اسلام آباد میں اپنی رہائش گاہ پر میڈیا سے گفتگو میں کیا۔انھوں نے کہا کہ وزیر اعظم کے احتساب کے حوالے سے ہمارے مطالبات واضح اور بنیادی ہیں، 16اکتوبر کو بلاول بھٹو نے 4مطالبات پیش کئے حکومت ان کو مانے،ہمارابنیادی مطالبہ اپوزیشن کا پاناما بل ہے، اس بل کو منظور کیا جائے۔ حکومت بل پاس کرلے تو تمام پریشانیاں ختم ہوسکتی ہیں۔عمران خان بھی اپوزیشن کے ٹی او آرز مناننے کی بات کرتے ہیں ۔انھوں نے کہا حکومتی ٹیم کے ساتھ گہری بات نہیں ہوئی، 4مطالبات سامنے رکھے ہیں جو بات ہوگی ان پر ہوگی ۔ ایک سوال کے جواب میں انھوں نے کہا کہ عمران خان لہجہ تھوڑا نرم رکھیں ،یہ مرحلہ اپوزیشن کے قائدین کے خلاف بولنے کا نہیں ہے ۔اس کا انھیں احساس ہونا چاہیے ۔انھوں نے کہا کہ عمران، قادری اور حکومت کی کیا کشمکش ہوتی ہے، اس پر بات نہیں کروں گا۔اگرضرورت پڑی تو متحدہ اپوزیشن کا اجلاس بلائیں گے۔ایک اور سوال کے جواب میں انھوں نے کہا کہ اپوزیشن سے تعاون مانگنا حکومت کی مجبوری ہے،سب کو پتا ہے حکومت کو کب ہماری یاد آتی ہے،حکومت کو صرف اور صرف مشکل میں ہی اپوزیشن کی یاد ستاتی ہے ۔

اعتزازاحسن

مزید : کراچی صفحہ اول