کراچی ، جرائم میں ملوث سی ٹی ڈی کا برطرف انسپکٹر گرفتار

کراچی ، جرائم میں ملوث سی ٹی ڈی کا برطرف انسپکٹر گرفتار

کراچی (اسٹاف رپورٹر)شہر قائد میں رینجرز نے سی ٹی ڈی کے ہمراہ مشترکہ کارروائی کرتے ہوئے سی ٹی ڈی کے بر طرف انسپکٹر ظہیراحمد عرف گل کو گرفتار کرلیا، ملزم جرائم کی سنگین وارداتوں میں ملوث تھا۔تفصیلات کے مطابق کراچی کے علاقے ملیر میں رینجرز نے سی ٹی ڈی کے ہمراہ مشترکہ کارروائی کی ، کارروائی کے دوران سی ٹی ڈی کے برطرف انسپکٹر ظہیر احمد عرف گل کو گرفتار کرلیا گیا۔رینجرز کے ترجمان کا کہنا ہے کہ ظہیر جرائم کی سنگین وارداتوں میں ملوث تھا جبکہ ملزم کو اغوا برائے تاوان پر سی ٹی ڈی سے برطرف کیا گیا تھا۔ترجمان کے مطابق ملزم گینگ وار اور سہیل ڈاڈاگروپ کواسلحہ فراہم کرتارہا اور منشیات فروشوں، قبضہ مافیا کی معاونت سے سہولت کاری کرتا تھا۔رینجرز ترجمان کا کہنا تھا ملزم برطرفی کے باوجودجعلی گرفتاریوں،رشوت لینے میں ملوث رہا جبکہ اس سے کلاشنکوف ،رائفل، 12بور، دستی بم، 32بور پستول ، بڑی تعدادمیں گولیاں،27کلوبارودی مواد اور 2 کلو چرس برآمد ہوئیں۔ترجمان کے مطابق ملزم کے قبضے سے مختلف ممالک کی کرنسی بھی برآمد کی گئی، جن میں امریکی ڈالر، ہانگ کانگ، ایرانی، سعودی ریال، بھارتی کرنسی شامل ہیں۔رینجر ترجمان نے مزید بتایا کہ ملزم کوقانونی چارہ جوئی کے لئے سی ٹی ڈی کے حوالے کردیا گیا جبکہ اس کے دیگر ساتھیوں کی گرفتاری کے لئے آپریشن جاری ہے۔

مزید : راولپنڈی صفحہ آخر