امریکا میں پارسل بم بھیجنے میں ملوث شخص گرفتار

امریکا میں پارسل بم بھیجنے میں ملوث شخص گرفتار
امریکا میں پارسل بم بھیجنے میں ملوث شخص گرفتار

  

واشنگٹن(یواین پی)امریکی حکام نے ڈاک کے ذریعے 12 مشتبہ پیکٹوں میں بم بھیجنے کے شبہے میں ایک شخص کو حراست میں لیا ہے۔

جسٹس ڈیپارٹمنٹ کی ترجمان نے بتایا کہ حکام اس بارے میں جلد ہی ایک نیوز کانفرنس کرنے والے ہیں۔میڈیا چینلز نے قانون فافذ کرنے والے ذرائع کے حوالے سے بتایا کہ پولیس نے میامی کے قریب سے ایک شخص کو گرفتار کیا ہے۔ مقامی ٹیلی وژن سٹیشنوں سے نشر کی جانے والی ویڈیو فوٹیج میں پولیس کو ایک سفید ویگن کا معائنہ کرتے ہوئے دکھایا گیا ہے جس کی کھڑکی پر سیاسی سٹکر لگے ہوئے ہیں۔ ویگن کو لے جانے کے لیے ایک ٹرک پر لادا گیا ہے۔واشنگٹن پوسٹ نے کہا ہے کہ یہ گرفتاری گزشتہ روز مزید 2مشتبہ پارسل بم پکڑے جانے کے بعد ہوئی،ان میں سے ایک پیکٹ فلوریڈا میں جب کہ دوسرا نیویارک میں پکڑا گیا۔ ابھی تک کوئی بم پھٹا نہیں ہے لیکن بموں کی بڑی تعداد نے حکام کو انتہائی چوکس کر دیا ہے۔

واشنگٹن پوسٹ کے مطابق گرفتار کیے جانے والے شخص کی شناخت سیزر سیاک کے طور پر ظاہر کی گئی ہے۔ اس کی عمر 56 سال ہے اور پولیس حکام کے مطابق اس کا ایک طویل مجرمانہ ریکارڈ ہے۔ فلوریڈا میں رہنے والا یہ شخص اس سے قبل بھی بم کی دھمکی کے سلسلے میں گرفتار ہو چکا ہے۔فلوریڈا کی پولیس کا کہنا ہے اس کے جرائم کا آغاز 29 سال کی عمر میں چوری سے ہوا تھا۔ سن 2002 میں اسے بم کی دھمکی کے الزام میں گرفتار کیا گیا تھا۔ پولیس نے اسے آخری بار 2015 میں گرفتار کیا تھا۔

مزید : بین الاقوامی