چیئرپرسن چائلڈ بیورو نے گھریلو ملازمہ پر تشدد کے واقعہ کا نوٹس لے لیا

لاہور(لیڈی رپورٹر)چیئرپرسن چائلڈ پروٹیکشن بیورو سارہ احمد نے فیصل آباد میں 10 سالہ گھریلو ملازمہ پر تشدد کے واقعہ کا نوٹس لے لیا۔ چیئرپرسن سارہ احمد کی ہدایت پر تشدد کا شکار10 سالہ گھریلو ملازمہ کو فیصل آباد میں تحویل میں لے لیا۔ فیصل آباد میں تھانہ مدینہ ٹاؤن کے علاقہ میں 10سالہ گھریلو ملازمہ ماریہ کو تشدد کا نشانہ بنایا گیا۔ تشدد کا شکار گھریلو ملازمہ کو مالکان نے گھر جانے کی ضد کی وجہ سے تشدد کا نشانہ بنایا۔ اس حوالے سے چیئرپرسن سارہ احمد نے بتایا کہ 10سالہ گھریلو ملازمہ کو مالکان نے ڈنڈوں، پائپ اور گرم چھری سے تشدد کا نشانہ بنایا۔تشدد کا شکار گھریلو ملازمہ کے چہرے، بازو، پاوں، کمر اور جسم کے دیگر حصوں پر تشدد کے نشانات موجود ہیں۔ انہوں نے کہا کہ تشدد کا نشانہ بنانے والے مالکان کے خلاف چائلڈ پروٹیکشن بیورو کی جانب سے ایف آئی آر درج کروائی جارہی ہے۔ تشدد کا شکار گھریلو ملازمہ کا مکمل میڈیکل کروایا جائے گا۔
تشدد کا نشانہ بننے والی معصوم گھریلو ملازمہ کو مکمل انصاف فراہم کیا جائے گا۔