عمران خان کو کس نے ارشد شریف پر حملے کی خبر دی،وہ کون تھا: شرجیل میمن 

       کراچی (اسٹاف رپورٹر)وزیراطلاعات سندھ شرجیل انعام میمن نے کہا ہے کہ  عمران خان کو کس نے ارشد شریف پر حملے کی خبر دی، وہ کون تھا جس نے بتایا۔کراچی میں میڈیا سے بات چیت کرتے ہوئے شرجیل میمن نے کہا کہ صحافی ارشد شریف کے قتل کی تحقیقات ہونی چاہیے۔ عمران خان نے کہا معلوم تھا ارشد شریف پر حملہ ہوسکتا ہے۔ وہ کون تھا جس نے حملے کا عمران خان کو بتایا۔ وہ حملے کی خبر دینے والے کا نام کیوں نہیں لے رہے؟انہوں نے کہا کہ عمران خان نے ارشد شریف کو ملک سے باہر جانے کا مشورہ کیوں دیا؟ تحریک انصاف ان کی موت پر کونسی مہم چلارہی ہے؟ تدفین کے ایک دن بعد ہی عمران خان نے لانگ مارچ کی کال دے دی۔ عمران خان ارشد شریف کی موت کو اپنے مفاد میں استعمال کر رہے ہیں۔شرجیل میمن نے کہا کہ سندھ کے عوام عمران خان کی دو نمبری کو جانتے ہیں۔ چیلنج کرتا ہوں عمران خان میری سیٹ سے انتخاب جیت کر دکھائیں۔