قطر کی عدالت کا بھارتی بحریہ کے 8سابق اہلکار وں کو سزائے موت کا حکم 

                                                             دوحہ (مانیٹرنگ ڈیسک ، نیوز ایجنسیاں )قطر کی عدالت نے اسرائیل کےلئے جاسوسی کرنے کے الزام میں بھارتی بحریہ کے 8 سابق اہلکاروں کو سزائے موت سنادی۔بھارتی میڈیا کے مطابق بھارتی حکومت نے قطر میں بھارتیوں کو سزائے موت ملنے کی تصدیق کر دی ہے۔بھارت کا کہنا ہے کہ فیصلے کی تفصیلات کا انتظار ہے، معاملے کو قطری حکام کےساتھ اٹھا ئیں گے۔بھارتی وزارت خارجہ سے جاری بیان میں کہا گیا ہے قطر کی کمپنی میں کام کرنےوالے 8 بھارتی شہریوں کو قطر کی عدالت نے سزا سنائی ہے، فیصلے سے گہرے صدمے میں ہیں،عدالت کے تفصیلی فیصلے کا انتظار کر رہے ہیں، اس سلسلے میں تمام قانونی اقدامات کریں گے، مقدمے کی حساس نوعیت کی وجہ سے اس معاملے پر مزید کچھ نہیں کہہ سکتے۔خیال رہے قطر میں کام کرنےوالے بھارتی بحریہ کے 8 سابق اہلکاروں کو اسرائیل کےلئے جاسوسی کے الزام میں 2022 میں گرفتار کیا گیا تھا۔بھارتی بحریہ کے یہ سابق اہلکار قطری بحریہ کےلئے ساز و سامان بنانے والی کمپنی میں کام کر رہے تھے۔رپورٹ کے مطابق سزا پانے والے ملزمان میں بھارتی بحریہ کا سابق افسر کیپٹن نوتیج سنگھ گل، برندرہ کمار ورما، سورابھ وشست ، کما نڈ ر امت نگپال، پریندو تواری، سگنا کر پکالا، سنجیو گپتا اور ملاح راجیش شامل ہے۔بھارتی میڈیا کے مطابق بھارتی ملزمان پر قطر کےلئے اٹلی میں تیار کردہ آبدوزوں کی خریداری کی تفصیلا ت اسرائیل کو دینے کا الزام تھا۔قطری انٹیلی جنس ذرائع نے دعویٰ کیا تھا انہوں نے آبدوز پروگرام سے متعلق کچھ ’الیکٹرونک کمونیکیشنز‘ پکڑی ہیں۔یاد رہے قطر نے دسمبر 2008 سے جنوری 2009 کے درمیان غزہ کی پٹی میں تین ہفتے تک جاری رہنے والے مسلح تنازعے کے بعد اسرائیل کےساتھ سفارتی تعلقات منقطع کرلیے تھے۔ایک رپورٹ کے مطابق امسال 25 مارچ کو سابق فوجیوں کےخلا ف مبینہ طور پر جاسوسی کے الزامات کے تحت مقدمات درج کیے گئے تھے۔ انہیں پہلی بار اگست 2022 میں قطری حکام نے اٹھایا اور مبینہ طور پر کم از کم اگلے آٹھ ماہ انہوں نے قید میں گزارے۔ان کی جانب سے قطری حکومت کو دی گئی ضمانت کی درخواستیں گزشتہ سال ستمبر سے لگاتار آٹھ مرتبہ مسترد ہوچکی ہیں۔

بھارتی اہلکارسزا