افغان پناہ گزینوں کی منتقلی پر برطانیہ کی وضاحت بھی آگئی
اسلام آ باد (آئی این پی ) افغان پناہ گزینوں کی برطانیہ روانگی سے متعلق پاکستان میں برطانیہ کے سفارتخانے کی وضاحت سامنے آگئی ۔
پاکستان میں برطانیہ کے سفارتخانے کے ترجمان نے کہا ہے کہ برطانیہ صرف ان افغانیوں کو ہی پروازیں فراہم کررہا ہے جو آبادکاری سکیم کا حصہ ہیں،سکیم میں شامل اور سفر کیلئے کلیئر افغانیوں کیلئے مخصوص پروازوں میں سیٹیں مختص ہیں۔
ترجمان نے مزیدکہاکہ وہ افغان باشندے جو آباد کاری سکیم کا حصہ نہیں، وہ اسلام آباد ایئرپورٹ کا سفرنہ کریں۔یادرہے کہ گزشتہ روز سول ایوی ایشن اتھارٹی کی جانب سے جاری بیان میں بتایا گیا تھا کہ 2 ہزار افغان پناہ گزینوں کو برطانیہ روانہ کیا جائے گا،چارٹرڈ پروازوں کا آپریشن دسمبر تک جاری رہے گا،پناہ گزینوں کی برطانیہ روانگی 26 اکتوبر سے ہوگی۔
