محکمہ تحفظ ماحول کے زیر اہتمام ڈینگی کی روک تھام کے حوالے سے آگاہی واک

  محکمہ تحفظ ماحول کے زیر اہتمام ڈینگی کی روک تھام کے حوالے سے آگاہی واک

  

لاہور(لیڈی رپورٹر) صوبائی سیکرٹری سلمان اعجاز کی ہدایت پر ڈائریکٹر جنرل  ماحولیات عرفان نذیر کی زیر قیادت ڈینگی کی روک تھام کے حوالے سے  آگاہی واک کا اہتمام کیا گیا جوسیکر ٹری آفس سے شروع ہو کر لبرٹی چوک پراختتام پذیر ہوئی، واک میں ڈائریکٹر ماحولیات نسیم الرحمن، نصرت ناز و دیگر افسران نے بھی شرکت کی۔  واک کے دوران شہریوں میں ڈینگی کے حوالے سے آگاہی پمفلٹس بھی تقسیم کیے گئے۔ اس موقع پر ذرائع ابلاغ کے نمائندوں سے گفتگو کرتے ہوئے ڈائریکٹر جنرل  ماحولیات نے کہا کہ حکومت پنجاب کی ہدایت پر عمل درآمد کرتے ہوئے محکمہ تحفظ ماحول ڈینگی کی روک تھام کے لیے بھر پور اقدامات اٹھا رہا ہے۔ انہوں نے بتایا کہ سرویلنس ٹیمیں مختلف علاقوں کا دورہ کر کے لاروا کی تلفی کو یقینی بنا رہی ہیں اورجہاں مچھر کی پیداوار اور بیماری کے امکانات ہیں وہاں احتیاطی تدابیر اختیار کی جا رہی ہیں۔ 

انہوں  نے کہا کہ ڈینگی لاروا کی تلفی مچھر سے پھیلنے والے امراض پر کنٹرول کو یقینی بنائے گی۔ مچھر مار ادوایات کے استعمال سے ماحول سے ڈینگی کے جراثیم کا خاتمہ ہو گا۔ انہوں نے کہا کہ ہر ذمہ دار شہری کا فرض ہے کہ وہ ڈینگی کے خاتمے اور اس کی روک تھام کے لیے اپنا کردار ادا کرے۔  شہری اپنے گھروں اور محلوں سے کوڑا کرکٹ، کھڑے پانی اور ایسی تمام جگہوں کی صفائی کو یقینی بنائیں جہاں ڈینگی مچھر کی افزائش ممکن ہو سکتی ہے۔ عوام حفظان صحت کے اصولوں پر عمل کرتے ہوئے صفائی کا خاص خیال رکھیں۔ انہوں نے مزید کہا کہ ڈینگی کے تدارک کے لیے ممکنہ حد تک حفاظتی اقدامات کو یقینی بنایا جارہا ہے۔غفلت کی صورت میں ذمہ داران کے خلاف کارروائی کی جائے گی۔

مزید :

کامرس -