نواز شریف کی تقریر پر تنقید کرنے والے بتائیں اُنہوں نے کون سی بات غلط کہی ؟سینیٹر ساجد میر نون لیگی قائد کی حمایت میں لنگوٹ کس کر میدان میں آگئے

نواز شریف کی تقریر پر تنقید کرنے والے بتائیں اُنہوں نے کون سی بات غلط کہی ...
 نواز شریف کی تقریر پر تنقید کرنے والے بتائیں اُنہوں نے کون سی بات غلط کہی ؟سینیٹر ساجد میر نون لیگی قائد کی حمایت میں لنگوٹ کس کر میدان میں آگئے

  

لاہور(ڈیلی پاکستان آن لائن)مرکزی جمعیت اہل حدیث پاکستان کے سربراہ سینیٹر پروفیسر ساجد میر نے کہاہے کہ اے پی سی میں نواز شریف کی تقریر پر تنقید کرنے والے یہ بتائیں کہ انہوں نے کون سی بات غلط کہی ہے؟ حق تو یہ تھا کہ ہم غور کرتے کہ نوازشریف نے کہا کیا ہے لیکن ہم نے اپنے سیاسی تعصب  میں کہنا شروع کردیا کہ نواز شریف نے ہندوستان کی زبان بولی ہے۔

مرکز اہل حدیث راوی روڈ میں منعقدہ تحفظ شعائر اسلام سیمینار سے خطاب کرتے ہوئے سینیٹر پروفیسر ساجد میر  کا کہنا تھا کہ نوازشریف نے تو کسی کانام تو نہیں لیا ،یہ تو پھر چور کی داڑھی میں تنکے والی بات ہوئی،غور طلب بات تو یہ ہونی چاہیے کہ نوازشریف نے جو کچھ کہا وہ درست ہے یا غلط؟۔انہوں نے سوال اٹھاتے ہوئے کہا کہ کیا یہ درست نہیں ہے کہ انتخابات کرانے سے حکومتیں بنانے تک پس پردہ قوتوں کا ہاتھ ہوتا ہے؟حکومتوں کو کون لگام دیتا ہے؟ نکیل ڈال کر کہا جاتا ہے کہ اس طرف جاؤ اور اس طرف جاؤ، یہ عام شہری سے پوچھ لیں وہ یہی بتائے گا  کہ اصل اقتدار کن کے ہاتھوں میں ہے؟آل پارٹیز کا نفرنس کے فیصلوں کی روشنی میں چلنے والی تحریک میں شامل ہوں گے۔

مرکزی ناظم اعلی ڈاکٹر حافظ عبدالکریم نے کہا کہ اسلام کے نام پر بننے والے ملک میں صرف محمد عربی ﷺ کا قانون چلے گا،ناموس رسالت ﷺ اور ناموس صحابہ ؓ پر کوئی سمجھوتہ نہیں کیاجائے گا،عالمی طاقتیں اپنے مفادات کی خاطر وطن عزیز کو فرقہ واریت کی آگ میں دھکیلنا چاہتی ہیں مگر ہم ان کے ناپاک عزائم ناکام بنا ئیں گے۔ مرکزی صدر اہل حدیث یوتھ فورس حافظ فیصل افضل شیخ نے کہا کہ اہل حدیث نوجوان اور اسلام کی سربلندی اور دفاع وطن کے لیے جانوں کے نذرانے پیش کریں گے۔

یوتھ فورس پنجاب کے صدر حافظ سلمان اعظم نے کہا کہ ملک میں دینی اقدا ر کو لادینی اقدامات کے ذریعے مسخ کیا جارہا ہے ہم دینی اقدار کا تحفظ کریں گے اس مقصد کے لیے ہم نے فیصلہ کیا ہے کہ تحفظ اقدار اسلام تحریک چلا ئی جاے گی۔ حافظ عامر صدیقی نے کہا کہ بھارت کی جانب سے منی لانڈرنگ اور خطے میں دہشتگردوں کی مالی معاونت کے انکشاف نے بھارت کا مکروہ چہرہ دنیا کے سامنے بے نقاب کردیا ہے۔امن دشمن بھارت دہشت گردوں کا سہولت کار اور منی لانڈرنگ کرنے والا بڑا ملک ہے، اس میں مودی سرکار کی چوری پکڑی گئی۔ اقوام متحدہ کی حالیہ رپورٹ کے بعد یواین او سے ہمارا مطالبہ ہے کہ وہ  بھارت کو عالمی دہشت گرد قراردے۔

چیف آرگنائرز حافظ ابتسام الہی ظہیر نے کہا کہ ناموس رسالتﷺ اور ناموس صحابہ ؓ کے لیے ہر قسم کی قربانی دیں گے،موجودہ حکومت فرقہ واریت پھیلانے والوں کی سرپرستی کررہی ہے،ہم امن کے داعی ہیں،یہ ملک بڑی قربانیوں کے بعد حاصل کیا ہے ہم اس کی سلامتی کے خلاف سازشیں کرنے والوں کا ڈٹ کر مقابلہ کریں گے۔علامہ محمد شفیق خاں پسروری نے کہا کہ پاکستان اور اسلام کی خاطر قربانیاں دینے والے نوجوانوں پر ہمیں فخر ہے۔اس ملک کا مستقبل نوجوانوں کے ہاتھ میں ہے۔ ہمیں اپنی صفوں میں اتحا پیدا کرنا چاہیے۔ حافظ قسیم نے کہا کہ ہل حدیث نوجوان اور اسلام کی سربلندی اور دفاع وطن کے لیے جانوں کے نذرانے پیش کریں گے۔  مولانا عبدالرشید حجازی نے کہا کہ پاکستان میں شعائر اسلام کی توہین  برداشت نہیں کی جائے گی۔ سیمینار میں مولانا غلام مصطفی ظہیر، مولانا مبشر احمد ربانی، ڈاکٹر حماد لکھوی،مولانا محمد نعیم بٹ،مولانا عبدالباسط شیخوپوری،ڈاکٹر عبدالغفور راشد،مولانا عبدالحمید عامر جہلمی،حافظ محمد یونس آزاد ودیگر مقررین نے بھی خطاب کیا۔

مزید :

علاقائی -پنجاب -لاہور -