رمضان المبارک میں عوامی ضروریات کو مدنظر رکھ کر لائحہ عمل تشکیل دینا ہو گا: وزیراعظم

    رمضان المبارک میں عوامی ضروریات کو مدنظر رکھ کر لائحہ عمل تشکیل دینا ہو ...

  

اسلام آبا د(سٹاف رپورٹر)وزیراعظم عمران خان نے ہدایت کی ہے کہ ماہ رمضان کے آنے والے دنوں میں حالات اور عوام کی ضروریات کو مد نظر رکھ کر لائحہ عمل تشکیل دیا جائے،ماضی میں اشرافیہ کی ضروریات اور مفادات کو مد نظر رکھتے ہوئے پالیسیاں تشکیل دی جاتی تھیں، کورونا وائرس کے چیلنج سے نمٹنے کے دوران ہم نے ملک کے تمام تر طبقوں خصوصاً غریب اور کمزور طبقوں کی ضروریات کو مد نظر رکھ کر حکمت عملی تشکیل دینی ہے،کورونا وائرس کی روک تھام کے لئے سماجی فاصلہ (سوشل ڈسٹنسنگ) کو یقینی بنانا معاشرے کے ہر فرد کی مشترکہ ذمہ داری ہے۔ان خیالات کا اظہار انہوں نے کورونا وباء کی صورتحال کے حوالے سے جائزہ اجلاس سے خطاب کرتے ہوئے کیا۔اجلاس میں وفاقی وزراء حماد اظہر، اسد عمر، مخدوم خسرو بختیار، سید فخر امام، عمر ایوب خان، معاون خصوصی برائے صحت ڈاکٹر ظفر مرزا، ڈاکٹر معید یوسف، چیئرمین این ڈی ایم اے و دیگر سینئر افسران شریک ہوئے۔معاون خصوصی برائے صحت نے اجلاس کو کورونا وائرس کی موجود صورتحال، سامنے آنے والے کیسز، شرح صحت یابی و شرح اموات کے بارے میں تفصیلی طور پر آگاہ کیا۔ اجلاس کو بتایا گیا کہ بیرونی دنیا کی نسبت پاکستان میں کورونا کیسز کی تعداد اور شرح اموات قدرے کم ہیں۔ وفاقی وزیر برائے صنعت حماد اظہر نے اجلاس کو تعمیرات کے شعبے میں طے شدہ لائحہ عمل کے مطابق دوسرے مرحلے میں اسٹیل سمیت دیگر کھولی جانے والی صنعتوں کے بارے میں آگا ہ کیا۔ وفاقی وزیر برائے صنعت حماد اظہر نے محنت کشوں اور مزدوروں کے لئے ترتیب دیے جانے والے 75 ارب روپے کے پیکیج کی تفصیلات سے آگاہ کیا۔ وزیراعظم کو بتایاگیاکہ وزارتِ صنعت اور احساس پروگرام کی معاونت سے 40 سے ساٹھ لاکھ افراد اس پیکیج سے مستفید ہوں گے۔ وفاقی وزیر نے کہاکہ چھوٹے کاروبار کیلئے تین ماہ کا بجلی کا بل حکومت ادا کریگی۔چیئرمین این ڈی ایم اے نے اجلاس کو ٹیسٹنگ کٹس، حفاظتی سامان، این -95ماسک، وینٹی لیٹرز و دیگر سامان کے بارے میں تازہ ترین صورتحال سے آگاہ کیا۔وزیرِ اعظم نے اجلاس سے خطاب کرتے ہوئے کہا کہ کورونا سے بچاؤ اور معاشی عمل کی روانی میں توازن رکھنا ہے، مساجد کے حوالے سے لائحہ عمل علمائے کرام کی مشاورت سے طے کیا گیا اور اس پر عمل درآمد کو یقینی بنانے کی ذمہ داری علمائے کرام نے خود اپنے ذمہ لی۔دریں اثناؤزیرِ اعظم عمران خان سے وزیر برائے توانائی عمر ایوب خان، ممبران قومی اسمبلی پرنس محمد نواز الائی اور علی خان جدون نے ملاقات کی، ممبران قومی اسمبلی نے وزیرِ اعظم کو اپنے اپنے حلقے کی صورتحال اور عوامی مسائل سے آگاہ کیا،ترقیاتی امور کے حوالے سے بھی بات چیت کی گئی۔ممبران قومی اسمبلی نے وزیرِ اعظم کو کورونا وائرس کی وجہ سے پیداہونے والی صورتحال اور ریلیف سرگرمیوں کے حوالے سے آگاہ کیا،وزیرِ اعظم نے ممبران قومی اسمبلی کو ہدایت کی کہ موجودہ صورتحال کے تناظر میں عوام اور خصوصاً کمزور طبقوں کو ریلیف کی فراہمی کے سلسلے میں متحرک کردار ادا کریں۔علاوہ ازیں وزیر اعظم عمران خان سے صدر اور سی ای او پی ٹی سی ایل راشد خان نے ملاقات کی اور کورونا ریلیف فنڈ کیلئے 10 کروڑ روپے کا چیک پیش کیا۔ ملاقات میں سیکرٹری آئی ٹی ڈویژن شعیب احمد صدیقی بھی ملاقات میں موجود تھے،وزیر اعظم نے پی ٹی سی ایل کی جانب سے ریلیف فنڈ میں عطیہ کو سراہا۔

وزیراعظم عمران خان

مزید :

صفحہ اول -