اظہر علی بھی کورونا وائرس کے متاثرین کی مدد کرنے والوں میں شامل ہو گئے، ایسا شاندار فیصلہ کر لیا کہ ہر پاکستانی داد دینے پر مجبور ہو جائے

اظہر علی بھی کورونا وائرس کے متاثرین کی مدد کرنے والوں میں شامل ہو گئے، ایسا ...
اظہر علی بھی کورونا وائرس کے متاثرین کی مدد کرنے والوں میں شامل ہو گئے، ایسا شاندار فیصلہ کر لیا کہ ہر پاکستانی داد دینے پر مجبور ہو جائے

  

لاہور (ڈیلی پاکستان آن لائن)عالمی وباءکورونا وائرس کے متاثرین کی مدد کیلئے اس وقت بے شمار لوگ کام کر رہے ہیں اور ان میں کھیلوں سے وابستہ شخصیات بھی شامل ہیں جن میں پاکستان ٹیسٹ ٹیم کے کپتان اظہر علی بھی شامل ہو گئے ہیں اور انہوں نے اپنے دل سے قریب چیزوں کو بھی نیلام کرنے کا فیصلہ کر لیا ہے۔

تفصیلات کے مطابق قومی ٹیسٹ ٹیم کے کپتان اظہر علی نے جس بلے کیساتھ اپنے کیرئیر کی واحد سنچری سکور کی وہ بیٹ نیلام کرنے کا فیصلہ کر لیا ہے جس کی بنیادی قیمت 10 لاکھ روپے مقرر کی گئی ہے۔ اسی طرح چیمپینز ٹرافی وننگ شرٹ بھی نیلام کریں گے جس پر ٹورنامنٹ میں حصہ لینے والی پاکستانی ٹیم کے تمام کھلاڑیوں کے دستخط ہیں جبکہ اس کی بنیادی قیمت بھی 10 لاکھ روپے رکھی گئی ہے۔

اظہر علی نے اپنے پیغام میں کہا کہ عالمی وباءکورونا وائرس کی وجہ سے اس وقت زندگی کے ہرشعبے سے تعلق رکھنے والے لوگ متاثر ہو ئے ہیں اور لاک ڈاﺅن کی وجہ سے لوگ مشکل وقت سے گزر رہے ہیں جنہیں اپنی بنیادی ضروریات پوری کرنے کیلئے مشکلات پیش آ رہی ہیں، اس نیلامی سے جو بھی رقم اکٹھی ہو گی وہ ان لوگوں میں تقسیم کی جائے گی۔

اظہر علی نے کہا کہ یہ رقم ایسے افراد میں بھی تقسیم کی جائے گی جنہیں میں پہلے سے جانتا ہوں، ان میں کرکٹرز اور کرکٹ سے وابستہ لوگ شامل ہیں۔ یہ میری ایک چھوٹی سی کوشش ہے تاکہ ان لوگوں کی مدد ہو سکے۔اظہر علی نے کہا کہ بیٹ اور شرٹ میرے دل کے بہت قریب ہیں،سوچا تھا کہ میں ان کو سنبھال کر رکھوں گا لیکن میں سمجھتا ہوں کہ اس مشکل وقت میں یہ چیزیں لوگوں کے کام آ سکیں تو مجھے زیادہ خوشی ہو گی۔

یہاں یہ امر قابل ذکر ہے کہ کپتان اظہر علی اس سے قبل پرائم منسٹر کورونا وائرس ریلیف فنڈ میں بھی 10 لاکھ روپے عطیہ کر چکے ہیں۔ واضح رہے کہ اظہر علی نے 2016ءمیں دبئی میں کھیلے جانے والے ڈے اینڈ نائٹ ٹیسٹ میچ میں ویسٹ انڈیز کے خلاف ناقابل شکست 302 رنز کی اننگز کھیلی تھی جبکہ 2017ءمیں سرفراز احمد کی کپتانی میں چیمپینز ٹرافی جیتنے والی پاکستان ٹیم کا بھی وہ حصہ تھے جنہوں نے بھارت کیخلاف فائنل میچ میں 71 گیندوں پر 59 رنز کی عمدہ اننگز کھیلی تھی۔ یہی دونوں یاد گار چیزیں اب کپتان اظہر علی نے نیلام کرنے کا فیصلہ کیا ہے۔

مزید :

کھیل -کورونا وائرس -