بے نظیر بھٹو نے مشرف سے کوئی این آر او سائن نہیں کیا تھا،رحمن ملک

سکھر( اے این این ) سابق وفاقی وزیر داخلہ رحمان ملک نے کہا ہے کہ بے نظیر بھٹو کے قتل میں جو لوگ ملوث تھے جلد ان کو آشکار کر دوں گا، عدالت ان کا کیس روز کی بنیاد پر چلائے توان کے قتل کی تمام سازش سامنے آجائے گی ان کے کچھ قاتل پکڑے گئے ہیں کچھ جیل میں ہیں تو کچھ ضمانت پر ہیں۔ ان خیالات کا اظہار انہوں نے گڑھی خدا بخش روانگی سے قبل سکھر ایئر پورٹ پر میڈیا اور تعزیتی جلسے سے خطاب کرتے ہوئے کیا ۔ انہوں نے کہا کہ محترمہ کے کیس کی ہم نے اوپر سے لے کر نیچے تک تفتیش کرائی اور اس کیس میں تو پرویز مشرف بھی ضما نت پر ہیں،میں پیپلز پارٹی پارلیمنٹرین کا صدر نہ بن رہا ہوں اور نہ بنوں گا، مگر جو بھی بنے گا وہ سرپرائیز ہو گا۔رحمان ملک نے مزید کہا کہ مجھے تو پہلے ہی افتخار چوہدری میں سیاست نظر آرہی تھی اور اس نے اسی دن اپنی سیاست کا سنگ بنیاد رکھ دیا تھا جب اس نے ہمارے وزیر اعظم کو سزا سنا کر گھر بھیج دیا تھا۔ محترمہ کا کیس روز کی بنیا د پر سما عت نہ ہونے کی وجہ سے آج تک لٹکا ہوا ہے، ہم تو جو قاتل پکڑنے گئے اس پر ڈرون گرا دیا گیایا پھر اسے قتل کر دیا گیا۔ آرمی چیف جو بھی قدم اٹھائیں گے پیپلزپارٹی ان کا ساتھ دیگی۔ آصف زرداری کی ملک سے عدم موجودگی کے سوال پر انہوں نے کہا کہ پیپلزپارٹی کے چیئرمین بلاول بھٹو زرداری ہیں اور وہ پاکستان میں موجود ہیں۔ آصف علی زرداری علاج کی غرض سے دبئی میں مقیم ہیں قیاس آرائیاں نہ کی جائیں۔باتیں بہت لوگ کرتے ہیں، قربانی صرف پیپلزپارٹی دیتی ہے۔ رینجرز اختیارات کے معاملے پر سندھ کی قانونی ٹیم جائزہ لے رہی ہے۔ہرطرف سے پیپلز پارٹی کو نشانہ بنایا جارہا ہے۔انہوں نے کہا کہ اداروں نے پیپلز پارٹی کو تختہ مشق بنادیا ہے۔