2019ء پاکستان ویمن کرکٹ کی بہتری کا سال رہا‘ بسمہ معروف

  2019ء پاکستان ویمن کرکٹ کی بہتری کا سال رہا‘ بسمہ معروف

  



لاہور(سپورٹس رپورٹر)پاکستان ویمن کرکٹ ٹیم کی کپتان بسمہ معروف نے سال 2019 کو پاکستان ویمن کرکٹ کی بہتری کا سال قرار دیدیا۔پاکستان ویمن کرکٹ ٹیم کی کپتان بسمہ معروف نے 2019 اور 2020 کے حوالے سے خصوصی گفتگو میں کہا کہ اس سال پاکستان ویمنز ٹیم کی کارکردگی اچھی رہی اور کھیل میں بہتری آئی ہے۔بسمہ معروف نے کہا کہ یہ سلسلہ گزشتہ برس شروع ہوا تھا اور اس میں بتدریج بہتری آتی گئی، ویسٹ انڈیز کے خلاف سیریز سے سال کا آغاز ہوا اور اپنے ہوم گراونڈز پر کامیابی حاصل کی، ٹی ٹوئنٹی اور ون ڈے میچز جیتے۔انہوں نے کہا کہ سب سے یادگار سیریز ساؤتھ افریقہ کے خلاف رہی کیونکہ ساؤتھ افریقہ کی سرزمین پر کھیلنا کبھی آسان نہیں رہا، جانے سے پہلے سوچا نہیں تھا کہ ساؤتھ افریقہ میں کارکردگی اتنی اچھی ہو گی۔پاکستان ویمن کرکٹ ٹیم کی کپتان بسمہ معروف نے کہا کہ کھیل کے تینوں شعبوں میں پاکستان ٹیم نے اچھے کھیل کا مظاہرہ کیا، اس سیریز سے کھلاڑیوں میں اعتماد بڑھا کہ وہ کہیں بھی اچھا کھیل سکتی ہیں۔

بسمہ معروف نے کہا کہ بنگلہ دیش ویمن ٹیم نے پاکستان کا دورہ کیا، اس سے اندازہ لگایا جا سکتا ہے کہ ٹیم بہتری کی طرف گامزن ہے تاہم میں سمجھتی ہوں کہ سال کا اختتام اچھا نہیں رہا۔ انہوں نے اپنی گفتگو میں کہا کہ ملائیشیا میں انگلینڈ کے خلاف سیریز میں نتائج توقع کے مطابق نہیں رہے، پاکستان ٹیم کو شکست ہوئی تاہم اس سیریز سے یہ اندازہ ضرور ہوا ہے کہ پاکستان ویمن ٹیم کو کہاں کہاں بہتری کی ضروت ہے اور اب ان شعبوں پر سخت محنت کی جا ئے گی۔کپتان بسمہ معروف نے آئندہ سال کے حوالے سے کہا کہ 2020 کے لیے بھی اچھے عزائم ہیں، اب کارکردگی میں مزید بہتری لانا ہے اور ٹیم کیلئے کچھ اہداف مقرر کیے ہیں جنہیں حاصل کرنا ہے۔انہوں نے کہا کہ اس وقت فوکس آسٹریلیا میں ہونے والا ورلڈ کپ ہے، آسٹریلیا میں کنڈیشنز آسان نہیں ہو تیں، کوشش یہی ہے کہ ان کنڈیشنز کے مطابق سخت محنت کریں اور 2020 اچھی کارکردگی سے یادگار بنائیں۔

مزید : کھیل اور کھلاڑی


loading...