اسلام آباد ( ڈیلی پاکستان آن لائن ) پاکستان کے وفاقی تحقیقاتی ادارے (ایف آئی اے) کا کہنا ہے کہ رواں برس غیر قانونی طور پر بیرونِ ملک پہنچنے کے خواہش مند 10ہزار سے زائد پاکستانی شہری ایران میں گرفتار ہوئے ہیں۔
روز نامہ امت نے ایف آئی اے حکام کے حوالے سے بتایا کہ رواں برس جنوری سے 15 دسمبر تک 10 ہزار 454 پاکستانی شہریوں کو ایران میں گرفتار کیا گیا، یہ لوگ بلوچستان کے غیر روایتی راستوں سے ایران میں داخل ہوئے تھے۔
پاکستانی حکام کا کہنا ہے کہ ان گرفتار افراد کو مختلف اوقات میں گرفتاری کے بعد ایرانی حکومت نے ضلع چاغی کے سرحدی شہر تفتان میں پاکستان کے حوالے کیا گیا۔
ایف آئی اے کے مطابق بلوچستان کے راستے پاکستانیوں کے علاوہ افغان شہری بھی بہتر مستقبل کی تلاش میں یورپی ملک جانے کی کوشش کرتے ہیں تاہم ان کی بڑی تعداد ایران میں گرفتار ہوجاتی ہے۔
حکام کے مطابق 2024ء میں ایران میں 2023ء کے مقابلے میں گرفتاریوں کی شرح زیادہ رہی، گزشتہ برس ایران میں گرفتار ہونے والے پاکستانیوں کی تعداد 8 ہزار 272 تھی۔
ایف آئی اے اعداد و شمار کے مطابق 2020ءسے 2024ءتک 5سال کے دوران پاکستان سے غیر قانونی طور پر ایران میں داخل ہونے والے 62 ہزار سے زائد پاکستانی شہری گرفتار ہوئے۔
حکام کے مطابق ایران میں گرفتار ہونے والے پاکستانی شہریوں میں سب سے زیادہ لوگوں کا تعلق پنجاب سے ہے، بلوچستان کے 5 اضلاع چاغی، واشک، پنجگور، کیچ اور گوادر کی سرحدیں ایران سے ملتی ہیں۔