بلوچستان میں بارش اور برفباری کا سلسلہ 29جنوری تک جاری رہے گا، محکمہ موسمیات کی پیشگوئی
کوئٹہ (ڈیلی پاکستان آن لائن )بلوچستان میں بارش اور برفباری کا سلسلہ جاری ہے جس سے شردی کی شدت میں بھی اضافہ ہوا ہے جبکہ محکمہ موسمیات کا کہنا ہے کہ یہ سسلسلہ 29 جنوری تک جاری رہے گا۔
تفصیلات کے مطابق کوئٹہ سمیت شمالی بلوچستان میں بارشوں اور برفباری کا دوسرا سپیل شروع ہو گیا ہے جس نے جہاں موسم کو دلفریب بنادیا ہے وہیں مشکلات بھی بڑھادی ہیں،، محکمہ موسمیات کے مطابق کوئٹہ، مستونگ اور چمن میں ایک ایک ملی میٹر بارش ہوئی جبکہ صوبائی دارالحکومت سمیت مستونگ، قلات، مسلم باغ اور کان مہترزئی میں پہاڑوں پر برف بھی پڑی۔
شمالی بلوچستان میں برفباری اور موسم کا لطف اٹھانے کے لیے کراچی سمیت سندھ بھر سے لوگوں کی بڑی تعداد زیارت اور کوئٹہ میں موجود ہے۔
برفباری کے بعد این ایچ اے اور پی ڈی ایم اے کی ٹیمیں متحرک ہیں۔ کوئٹہ پاس مستونگ کان مہترزئی سے برف کی صفائی جاری ہے اور کئی علاقوں میں قومی شاہراہیں کلیئر ٹریفک بحال کر دی،دوسری جانب شدید سردی نے مقامی افراد کی مشکلات بھی بڑھا دی ہیں، گیس ناپید ہونے کی وجہ سے عوام کا انحصار لکڑیوں اور کوئلے پر بڑھ گیا ہے۔
ماہرین موسمیات کا کہنا ہے کہ بلوچستان میں ہونے والی حالیہ بارشوں اور برفباری سے زیر زمین قابل استعمال پانی کی سطح بڑھے گی، اس کے علاوہ جہاں پھلوں کے باغات پر مثبت اثرات پڑیں گے وہیں سردی کی حالیہ لہر کا دورانیہ مزید بڑھ گیا ہے۔
دوسری جانب محکمہ موسمیات کے مطابق کوئٹہ، ژوب، بارکھان، ہرنائی، قلعہ سیف اللہ، قلعہ عبداللہ،چمن، پشین، پنجگور، تربت، خضدار، قلات اور مکران میں ہلکی سے درمیانی بارش اور پہاڑوں پر برفباری کا سلسلہ اتوار تک جاری رہے گا۔
محکمہ موسمیات کا کہنا ہے کہ اسلام آباد، خطہ پوٹھو ہار، شمال مشرقی پنجاب، شمالی بلوچستان، خیبر پختونخواہ، کشمیراور گلگت بلتستان میں آج (28 جنوری) سے پیر (30 جنوری 2023) تک بارش اور پہاڑوں پر برفباری کا سلسلہ جاری رہے گا جب کہ بعض مقامات پر ژالہ باری بھی ہوسکتی ہے۔
