آپ کے اور میرے محبوب قائد نوازشریف جلد ہی پاکستان میں ہوں گے :مریم نواز
لاہور (ڈیلی پاکستا ن آن لائن ) مسلم لیگ (ن )لیگ کی سینئر نائب صدر مریم نواز نے کہاہے کہ نوازشریف بہت جلد پہلے سے زیادہ طاقت کے ساتھ پاکستان واپس آئیں گے ،مسلم لیگ (ن )الیکشن سے نہیں ڈرتی الیکشن جب بھی ہوں گے پنجاب میں بھاری اکثریت سے جیتیں گے ، جو نئی ذمہ داریاں ملی ہیں اب ایک دن بھی آرام سے نہیں بیٹھوں گی ، یکم فروری سے پنجاب کے ہر ضلع کا دورہ کروں گی ، جب تک ملک کو مشکلات سے نہیں نکالیں گے آرام سے نہیں بیٹھیں گے ۔
وطن واپسی پر کارکنوں سے خطاب کرتے ہوئے مریم نواز نے کہا کہ آپ کو نواز شریف کی طر ف سے سلام ، انہوں نے کہا جب تم میرے لوگوں میں جانا تو میرا پیار بھرا سلام دینا، آپ کا شکریہ کہ اتنی بڑی تعداد میں اپنی بہن اور بیٹی کا استقبال کیا ، آپ کا اور میرا قائد بہت جلدی انشاءاللہ آپ کے درمیان موجود ہو گا . ان لوگوں نے نوازشریف کو بار بار نکالا،3 بار اللہ نے حکومت دی ، انہوں نے3 بار حکومت سے نکال دیا ،2 دفعہ ملک سے نکال دیا ، آج بھی نوازشریف اس ملک کا سب سے بڑا لیڈر ہے ، وہ بار بار واپس آیا ، پہلے سے بڑھ کر طاقت سے واپس آیا، انشاءاللہ وہ آنے والے دنوں میں پھر واپس آئے گا ۔
میں اللہ کے بعد نوازشریف , شہبازشریف اور آپ سب کا شکریہ ادا کرتی ہوں جو آپ نے میرے پر اعتماد کا اظہار کیا ، جو نئی ذمہ داری ملی ہیں، اپنے وطن اور پارٹی سے وعدہ کرتی ہوں ایک دن بھی آرام سے نہیں بیٹھوں گی .جولائی 2017 میں ترقی کرتے ہوئے پاکستان میں نوازشریف کو ایک اقامہ پر نکال دیا وہ قومی سانحہ تھا، 28 جولائی 2017 پاکستان کا بہت بڑا سانحہ ہے ، آج پاکستان سنبھلنے میں نہیں آ رہا، میرا وعدہ ہے جب تک قوم کی تقدیر نہیں بدلیں گے اس وقت آرام سے نہیں بیٹھیں گے۔
نوازشریف کے خلاف ساز ش کرنے والے سارے کردار اپنے اپنے انجام کو پہنچے ہیں یا نہیں ؟ نوازشریف نے تم سے انتقام نہیں لیا، مریم نواز نے تم سے انتقام نہیں لیا، شہبازشریف نے انتقام نہیں لیا ، تم اللہ کے حساب کا نشانہ بنے ہو۔میں پاکستان کی عوام سے بھی مخاطب ہوں ، مجھے اور نوازشریف کو احساس ہے کہ ملک میں مہنگائی ہے ، بجلی ، روٹی مہنگی ہے ، میں قوم سے وعدہ کرنا چاہتی ہوں کہ وہ نوازشریف ہی تھا جس نے 3 مرتبہ قوم کو مشکل سے نکالا اور مرتبہ ترقی کے راستے پر ڈالا تو امید رکھیں انشاءاللہ ترقی کرتاہوا پاکستان بہت جلد واپس آئے گا .ایسے انسان کو باہر نکالا گیا محض ایک اقامے پر، جس کی 9سال کی کارکردگی کو 75 سالہ تاریخ سے باہر نکال دو تو پاکستان میں کھنڈرات کے علاوہ کچھ نہیں بچتا ، پاکستان کو نااہلی کی سزا ملی یا اہلیت کی سزا ملی، انشاءاللہ وہ دن دور نہیں جب نوازشریف کی قیادت میں ملک ایک بار پھر آگے بڑھے گا ۔
آج اس شخص کو مہنگائی کا خیال آرہاہے جو اپنے دور میں فرعونیت سے کہتا تھا کہ مجھے مہنگائی کا ٹی وی سے پتا چلا ہے ، جو پرچیاں پڑھ کر قیمتیں بتاتا تھا، پہلے پچھلے5سال کا حساب ہوگا، 4سال کی نااہلی سے معیشت کو جس حال میں پہنچایا گیا ہے ، کچھ وقت لگے لیکن اسحاق ڈار پر یقین رکھو معیشت کو اس عذاب سے نکالیں گے .مسلم لیگ( ن) کو طعنے دینے والے سن لیں ، ابھی چند دن پہلے حکومت بھی خود توڑی اب رو بھی خود رو رہاہے۔ رونے کی تیاری کر لو ، باقی زندگی رونا پڑے گا، چند دن پہلے پنجا ب میں اسی کی حکومت تھی، بلوچستان اور کے پی کے میں بھی حکومت اسی کی تھی، گلگت بلتستان میں بھی آج اس کی حکومت ہے لیکن الزام نوازشریف کو دیتا ہے ۔
جن حکومتوں کے بل بوتے پر اپنا خرچا چلاتا تھا ، ہیلی کاپٹر میں پھرتا تھا ، سیکیورٹی استعمال کرتا تھا ، اپنے ہاتھ سے آج حکومت توڑی اور آج سڑکوں پر جا کر رو رہا ہے ۔مسلم لیگ(ن) اور میرے یہ شیر الیکشن سے نہیں ڈرتے ، پنجاب میں آنے والے الیکشن کو یاد رکھنا انشاءاللہ (ن )لیگ بھاری اکثریت سے جیتے گی ۔
دوران تقریر مریم نواز کا کہنا تھا کہ میری سرجری کو زیادہ دیر نہیں ہوئی ، میرا گلا تھوڑا خراب ہے ،3 گھنٹے کی سرجری ہوئی ، ڈاکٹر نے کہا کہ بال بال بچی ہو ، تمہارا کوئی نقصان نہیں ہوا، انہیں پتا تھا کہ 5 سال سے میری سرجری ہونی ہے ، وہ سرجری صرف 2 ملکوں میں ہوتی ہے ، انہوں نے مجھے پاسپورٹ نہیں دیا ، میں نے ان سے اپنا پاسپورٹ نہیں مانگا ، اللہ نے ہمیں ان کے ظلم کے باوجود ان کے آگے جھکنے نہیں دیا ۔
جلسے سے خطاب کے آخر میں مریم نواز نے کارکنوں سے کہا کہ "مجھ سے وعدہ کرو کہ پاکستان کی تقدیر بدلنے کیلئے نوازشریف کا ساتھ دو گے ، پنجاب کی تقدیر بدلنے کیلئے نوازشریف اور شہبازشریف کا ساتھ دو گے ، میں بھی وعدہ کرتی ہوں کہ ایک دن بھی آرام سے نہیں بیٹھوں گی ۔اب روز آپ سے ملاقات ہو گی ، میں پنجاب کے دورے پر نکلنے والی ہوں" ۔
