کراچی : ماہ شوال کا چاند دیکھنے کیلئے مرکزی رویت ہلال کمیٹی کا اجلاس آج ہوگا

کراچی(مانیٹرنگ ڈیسک ) مرکزی رویت ہلال کمیٹی کا اجلاس آج ہوگا جہاں شوال کا چاند دیکھا جائے گا۔تفصیلات کے مطابق شوال کا چاند دیکھنے کے لئے مفتی منیب الرحمان کی سربراہی میں مرکزی رویت ہلال کمیٹی کا اجلاس آج شام صوبائی دارلحکومت میں ہوگا ، چاند دیکھنے کے لئے زونل اور صوبائی کمیٹیوں کے بھی اجلاس منعقد کئے جائیں گے اور ملک کے مختلف حصوں سے شوال کے چاند سے متعلق جمع ہونے والی شہادتوں کا جائزہ لیا جائے گا۔ صوبائی اور زونل کمیٹیاں موصول ہونے والی شہادتوں کے حوالے سے مرکزی کمیٹی کو آگاہ کریں گی جس کے بعد شہر قائد میں موجود مرکزی رویت ہلال کمیٹی جائزہ لینے کے بعد شوال کے چاند کا اعلان کرے گی۔ مرکزی کمیٹی کی جانب سے شہادتوں کا جائزہ لینے کے علاوہ دوربین کی مدد سے شوال کا چاند بھی دیکھا جائے گا اور چاند نظر آنے کی صورت میں مفتی منیب الرحمان عید الفطر کا اعلان کریں گے۔ محکمہ موسمیات کا کہنا ہے کہ مطلع ابر آلود ہے تاہم شوال کا چاند نظر آنے کا قوی امکان موجود ہے۔