روس کی امریکی فوجیوں کی ہلاکت کے بدلے طالبان کو پیسے دینے کی پیشکش،امریکی اخبارکےالزامات پر ماسکو اور طالبان کا ردعمل بھی آگیا

روس کی امریکی فوجیوں کی ہلاکت کے بدلے طالبان کو پیسے دینے کی پیشکش،امریکی ...
روس کی امریکی فوجیوں کی ہلاکت کے بدلے طالبان کو پیسے دینے کی پیشکش،امریکی اخبارکےالزامات پر ماسکو اور طالبان کا ردعمل بھی آگیا

  

نیویارک(ڈیلی پاکستان آن لائن) امریکی اخبار نیویارک ٹائمز نے الزامات عائد کیے ہیں کہ روس نے  امریکی فوجیوں کی ہلاکت کے بدلے طالبان کو پیسے دینے کی پیشکش کی ہے جس پر ماسکو حکومت  اور طالبان کا ردعمل بھی آگیا۔

امریکی اخبار نیو یارک ٹائمز کی رپورٹ کے مطابق امریکی انٹیلی جنس کے عہدیداروں نے کہا تھا کہ طالبان سے وابستہ جنگجوؤں یا ان کے ساتھ قریبی وابستہ عناصر نے روسیوں سے کچھ انعام کی رقم وصول کی تاہم یہ ابھی تک واضح نہیں ہوسکا کہ کن حملوں کے بدلے انہیں کتنی رقم دی گئی۔

ڈان نیوز کے مطابق اس حوالے سے برطانوی خبررساں ادارے رائٹرز نے وائٹ ہاؤس، سینٹرل انٹیلی جنس ایجنسی (سی آئی اے) اور ڈائریکٹر آف نیشنل انٹیلی جنس کے دفترسے موقف لینے کی کوشش کی تاہم اسے جواب نہیں مل سکا۔

  واشنگٹن میں روسی سفارتخانے نے رپورٹ میں لگائے گئے الزامات کی مذمت کرتے ہوئے انہیں 'بے بنیاد اور من گھڑت' قرار دیا۔روسی سفارتخانے کے مطابق  'ان دعوؤں سے واشنگٹن اور لندن میں روسی سفارتخانوں کے ملازمین کی زندگی کو براہ راست خطرہ لاحق ہے'۔

دوسری جانب طالبان کے ترجمان ذبیح اللہ مجاہد نے بھی نیویارک ٹائمز کی رپورٹ کی تردید کرتے ہوئے کہا کہ 'طالبان کے کسی بھی انٹیلی جنس ایجنسی کے ساتھ اس طرح کے تعلقات نہیں ہیں اور امریکی اخبار کی رپورٹ طالبان کو بدنام کرنے کی کوشش ہے۔

انہوں نے کہا کہ 'روسی خفیہ ایجنسی کے ساتھ اس قسم کے معاہدے بے بنیاد ہیں، ہمارے حملے اس سے پہلے برسوں سے جاری تھے اور ہم نے اپنے وسائل سے یہ کام کیا۔'ذبیح اللہ مجاہد نے کہا کہ 'یہ امریکیوں کے ساتھ ہمارے معاہدے کے بعد تبدیل ہوا اور ان کی زندگی محفوظ ہے اور اب ہم ان پر حملے نہیں کر رہے'۔

مزید :

بین الاقوامی -