کورونا کی چھٹی لہر، ریلوے، پبلک ٹرانسپورٹ، فضائی سفر کیلئے ماسک لازمی قرار، 2افراد جاں بحق382نئے کیس رجسٹرڈ
اسلام آباد، لاہور (جنرل رپورٹر، مانیٹرنگ ڈیسک، نیوز ایجنسیاں) کورونا کی ممکنہ چھٹی لہر کا خطرہ پھر سر اٹھانے لگا، مہلک وائرس کے شکار مزید دو افراد جاں بحق ہو گئے۔ملک میں کورونا کیسز میں تیزی سے اضافہ جاری ہے، گزشتہ چوبیس گھنٹے کے دوران تین سو بیاسی نئے کیسز رپورٹ ہوئے جبکہ ملک بھر میں کورونا مثبت کیسز کی شرح دو اعشاریہ آٹھ پانچ ریکارڈ کی گئی۔ ستاسی مریضوں کی حالت تشویشناک ہے۔کورونا وبا کے کیسز میں دوبارہ اضافے کے سبب این سی او سی نے ملک کے اندر تمام ڈومیسٹک پروازوں، ریلوے اور پبلک ٹرانسپورٹ میں سفر کے دوران ماسک پہننا لازمی قرار دے دیا ہے تمام شہریوں سے کہا گیا ہے کہ سفر کے دوران ماسک کا استعمال کریں۔سول ایوی ایشن اتھارٹی کی جانب سے فضائی سفر کرنے والوں کے لیے ٹریول ایڈوائزی جاری کردی گئی، ملک بھر میں فضائی سفر کرنے والے مسافر فیس ماسک کا استعمال یقینی بنائیں۔قومی ادارہ برائے صحت میں این سی اوسی کے اجلاس میں کورونا صورتحال پر غور کیاگیا، این آئی ایچ نے بریفنگ کے دوران بتایا کہ ملک کے کچھ شہروں میں کورونا کیسز میں معمولی اضافہ ہوا ہے24گھنٹوں کے دوران لاہورسے کورونا کے 55 نئے مریض سامنے آگئے۔لاہور سمیت پنجاب کے دیگر علاقوں میں کورونا وائرس کے جو کنفرم کیسزہے ایک دفعہ پھر سے ا ن میں اضافہ دیکھنے کو آرہا ہے۔ گزشتہ 24گھنٹوں کے دوران لاہورسے کورونا کے 55 نئے مریض سامنے آگئے ہیں۔ پنجاب بھر کے 36 اضلاع میں کورونا وائرس کے مثبت کیسز کی شرح 2.1فیصد ریکارڈ کی گئی جبکہ لاہور میں کورونا وائرس کے مثبت کیسز کی شرح 8.2 فیصد ریکارڈ کی گئی ہے۔
کورونا
