جولائی کیلئے گیس نہیں ملی لوڈشیڈنگ مزید بڑھے گی, وزیراعظم نے واضح کر دیا

اسلام آباد(ڈیلی پاکستان آن لائن )وزیراعظم شہباز شریف کا کہنا ہے کہ انٹر نیشنل مانیٹری فنڈ (آئی ایم ایف )کی سخت شرائط کو پاکستان تحریک انصاف (پی ٹی آئی )حکومت نے مان لیا تھا، ہمیں جولائی کیلئے گیس کے جہاز نہیں ملے مگر ہم کوشش کر رہے ہیں،ممکن ہے جولائی میں لوڈشیڈنگ بڑھے۔

 نجی ٹی وی "سماء "کے مطابق اتحادی جماعتوں کے ارکان قومی اسمبلی سے خطاب کرتے ہوئے وزیراعظم نے کہا کہ  عوام مہنگائی کا سامنا کر رہے ہیں، صاحب ثروت افراد سے 200 ارب روپے سے زائد جمع ہونے کی توقع ہے،پاکستان دیوالیہ ہونے سے بچ گیا ہے، بہت جلد آئی ایم ایف سے معاہدہ ہونے والا ہے۔

ان کا مزید کہنا تھا کہ دنیا میں کوئلہ بہت مہنگا ہو چکا ہے،  پاکستان کے اربوں ڈالر کوئلے کی درآمد پر خرچ ہوتے ہیں، افغانستان سے جولائی میں انشااللہ کوئلہ آنا شروع ہو گا، افغانستان سے کوئلے کی درآمد سے 2 ارب ڈالر کے قریب بچیں گے، افغانستان سے کوئلہ ڈالر میں نہیں روپے میں خریدیں گے۔

وزیراعظم نے کہا کہ چیلنجز  آئیں گے لیکن  ہم آگے بڑھتے رہیں گے اور مسائل حل ہوں گے، دوست ممالک سے تکنیکی مدد، سرمایہ کاری اور تجارت کریں گے، کشکول کا زمانہ ختم ہوگا، نیا زمانہ آئے گا، اتحادی حکومت ضرور  تبدیلی لے کر آئے گی۔

شہباز شریف نے کہا کہ خواجہ آصف کی سربراہی میں افغانستان سے کوئلہ درآمد کرنے کیلئے کمیٹی بنائی ہے۔