یوم تکبیر قومی غیرت،قوم کے نہ جھکنے کے اعلان کا دن، نوازشریف

یوم تکبیر قومی غیرت،قوم کے نہ جھکنے کے اعلان کا دن، نوازشریف

  



اسلام آباد (سٹاف رپورٹر) سابق وزیر اعظم اور مسلم لیگ (ن)کے قائد نوازشریف نے کہاہے کہ یوم تکبیر قومی غیرت اور پاکستانی قوم کے نا جھکنے کے اعلان کا دن ہے،قوم کا سر فخر سے بلند رکھنے کی پاداش میں جلا وطنی اور قید و بند کی صعوبتیں برداشت کیں،عوام کے آئینی حقوق، عوام کی بالادستی، ووٹ کی عزت، پاکستان کی سالمیت اور پاکستان کی خود مختاری پر نا پہلے کوئی سمجھوتہ کیا ہے اور نا اب کرونگا۔ پیر کو مسلم لیگ (ن)کے قائد نواز شریف نے یوم تکبیر کے موقع پر قوم کے نام جیل سے جاری کیئے گئے پیغام میں کہا ہے کہ 28مئی پاکستانی تاریخ کا ایک ناقابلِ فراموش دن ہے، اس دن ملک کا دفاع ناقابل تسخیر بنا دیاگیا جب پاکستان ایک ایٹمی قوت کے تعارف کے ساتھ دنیا کے نقشے پر نمودار ہوا،یوم تکبیر قومی غیرت کا دن ہے۔انہوں نے کہاکہ یوم تکبیر جہاں پاکستانی قوم کے بے مثال جرات اور بہادری کی علامت کا دن ہے وہاں پاکستان کے دشمنوں اور بد خواہوں کیلئے بھی یہ پیغام ہے کہ پاکستان کے خلاف جارحیت کا مظاہرہ کرنے والوں کاانجام عبرت ناک ہوگا۔آج سے21 سال پہلے جب ہماری حکومت نے یہ فیصلہ کیا تو اسے طرح طرح کے چیلنجوں کا سامنا تھا، ایک طرف اقتصادی پابندیوں کی دھمکیاں دی جا رہی تھیں اور اس اقدام کو ناقابل معافی جرم کے طور پر پیش کیا جا رہا تھااور دوسری طرف دھماکہ نا کرنے کے عوض اربوں ڈالرز کی پیشکش کی جا رہی تھی۔ہم نے اللہ تعالیٰ کے بھروسے اور عوام کی تائید کے بل بو تے پر ان چیلنجوں کو قبول کیا اور پاکستان کے وقار کاعلم سر بلند رکھا۔ انہوں نے کہاکہ 28 مئی پاکستانی قوم کے نا جھکنے کے اعلان کا دن ہے۔ انہوں نے کہاکہ قوم کا سر فخر سے بلند رکھنے کی پاداش میں جلا وطنی اور قید و بند کی صعوبتیں برداشت کیں۔ ایٹمی دھماکوں کے بعد ہماری گذشتہ حکومت میں پاکستان کو معاشی طور پر مستحکم کرکے سی پیک کی شکل میں معاشی دھماکہ کیا، تو عالمی سازشوں نے ایک دفعہ پھر سر اٹھا لیا، جس کے نتیجے میں آج مجھے اپنی سانسوں کا بھی حساب دینا پڑ رہا ہے۔ انہوں نے کہاکہ میرا ایک اصولی موقف ہے کہ دنیا میں پاکستان خود مختار رہے اور پاکستان میں بسنے والے خود اختیار رہیں اس نظریہ کی سزا میں پہلے اب بھگت چکا ہوں اور اب بھی بھگت رہا ہوں لیکن جیل کی اس کال کوٹری سے میں اپنے ہم وطنوں کو یقین دلانا چاہتا ہوں کہ آپ کے آئینی حقوق، عوام کی بالادستی، ووٹ کی عزت، پاکستان کی سالمیت اور پاکستان کی خود مختاری پر نا پہلے کوئی سمجھوتہ کیا ہے اور نا اب کرونگا۔ انہوں نے کہاکہ ہم پاکستان اور پاکستانی عوام کو ان کی منزل دلا کر رہے نگے۔ اللہ پاکستان کا حامی و ناصر ہو ہو۔ پاکستان زندہ باد

نوازشریف

مزید : صفحہ اول


loading...