حادثہ میں جاں بحق زارا عابد کی پہلی شارٹ فلم ’سکہ‘یوٹیوب پر ریلیز
لاہور (فلم رپورٹر)کراچی میں حادثے کا شکار ہونے والی پی آئی اے کی پرواز پی کے 8303 میں جاں بحق ہونے والی معروف ماڈل زارا عابد کی پہلی شارٹ فلم ’سکہ‘یوٹیوب پر ریلیز ہوگئی۔یوٹیوب پر ریلیز کی جانے والی شارٹ فلم ’سکہ‘ کے ہدایت کار احمد صارم ہیں جبکہ یہ فلم زارا عابد کی زندگی کی پہلی ہے جبکہ ان کی آخری فلم”چوہدری”ابھی ریلیز نہیں ہوئی فلم کی ٹیم کی جانب سے اْن کے لئے ایک پیغام جاری کیا گیا ہے جس میں لکھا ہے کہ ”زارا تمہارے لئے اور تمہارے کبھی نہ ختم ہونے والے پیار کے لئے ہے۔اپنی صلاحیتوں کو ہمارے ساتھ بانٹنے کا بہت شکریہ، یہ ہمیشہ ہمارے دلوں میں زندہ رہے گا۔ آپ کی روح کو سکون ملے۔
‘اس مختصر فلم میں کوئی ڈائیلاگ نہیں ہے جبکہ اداکارہ صبا قمر نے فلم میں کہانی بیان کی ہے، جس میں زارا کو دو ایسی خواتین کے روپ میں دکھایا گیا ہے جو ایک بالکل الگ زندگی گزار رہی ہیں لیکن ان کی خواہشات ایک جیسی ہیں۔اس فلم میں دونوں خواتین کے کردار زارا عابد نے بخوبی نبھائے ہیں، ایک کردار میں وہ عام سی غریب لڑکی بنی ہیں جبکہ دوسرے میں وہ ایک امیر لڑکی کے روپ میں نظر آرہی ہیں۔
