پی سی بی میں اہم ذمہ داری ملتے ہی ثقلین مشتاق نے زوردار اعلان کر دیا
لاہور (ڈیلی پاکستان آن لائن) قومی ٹیم کے سابق مایہ ناز ٹیسٹ کرکٹر ثقلین مشتاق نے کہا ہے کہ پاکستان کی نمائندگی کرنا ایک اعزاز کی بات ہے اور میں نئی پیشکش پر بہت خوش ہوں۔
تفصیلات کے مطابق ثقلین مشتاق نے اپنی تقرری پر اظہار خیال کرتے ہوئے کہا کہ پاکستان کی نمائندگی کرنا ایک اعزاز ہے اور میں اس پیشکش پر بہت خوش ہیں جس کے ذریعے نوجوان کرکٹرز کے ساتھ کام کرنے اور ان کے کیرئیر کو مزید نکھارنے کا موقع مل رہا ہے۔
ثقلین مشتاق نے کہا کہ ماضی میں بھی کئی کرکٹرز کے ساتھ مل کر ان کے کھیل میں بہتری لانے کیلئے کام کر چکا ہوں، ہائی پرفارمنس سینٹر میں اپنے علم کو دوسروں تک پہنچانے اور پی سی بی کے بینچ مارک کو اوپر لے جانے میں مدد کرنے کیلئے بہت پرامید ہوں۔
سابق سپنر نے کہا کہ بلاشبہ میں نے اس پیشکش کو قبول کرنے سے قبل بہت سے پہلوؤں پر غور کیا تھا، پی سی بی کی حکمت عملی مجھے درست سمت میں کام کرتی دکھائی دیتی ہے اور لاہور کے ہائی پرفارمنس کی ٹیم کو جوائن کرنے اور پاکستان کرکٹ کو اس کے سنہری دور میں واپس لے جانے کیلئے یہ ایک بہترین وقت ہے۔
