معاشرے کے مسائل کو اجاگر کرنے کیلئے جامع حکمت عملی اپنائی،منیزہ ہاشمی

 
لاہور(فلم رپورٹر)عوام کو معیاری تفریح اور معاشرے کے مسائل کو مثبت انداز میں اجاگر کرنے کے لئے جامع حکمت عملی اپنائی گئی ہے،اس ضمن میں نہ صرف فیملی تھیٹر کی تجدید نو کی گئی ہے بلکہ اسے جدید تقاضوں سے ہم آہنگ کیا جارہا ہے،الحمرا کے باقاعدہ سلسلوں جن میں ”الحمرا ان ویل“، ”کچھ یادیں،کچھ باتیں“ و دیگر پروگرام شامل ہیں،کی کامیابی کے بعد آج کے نوجوان درخشاں ستاروں کے ساتھ پندرہ روزہ نشست ”ہیروز آف ٹو مارو“ شرو ع کیا جا رہا ہے۔ ان خیالات کا اظہار چیئرپرسن بورڈ آف گورنر لاہور آرٹس کونسل الحمرا منیزہ ہاشمی نے محکمانہ کارکردگی کے جائزہ اجلاس کی صدارت کرتے ہوئے کیا۔ انھوں نے کہا کہ الحمرا میں سنجیدہ اور فیملی تھیٹر کے فروغ کے لئے دیگر ثقافتی تنظیموں کے تعاون سے خصوصی کھیل پیش کئے جائیں،الحمرا میں پیش کئے جانے والے پروگرامز میں عوام الناس کو زیا دہ سے زیادہ شریک کرنے کے اقدامات کئے جا رہے ہیں۔ایگزیکٹوڈائریکٹر لاہور آرٹس کونسل الحمرا اطہر علی خان نے کہا کہ الحمرا آرٹ میوزیم میں رکھی گئی نادر، نایاب اور قیمتی پینٹنگ پر مبنی کتابچہ((Catalogشائع کیا جا رہا ہے،الحمرا کے پلیٹ فارم سے عوام کو معیاری تفریحی سہولتوں کی فراہمی یقینی بنائی جارہی ہے، کمرشل ڈراموں کی موثر مانیٹرنگ کی جارہی ہے،الحمرا اکیڈمی آف پرفارمنگ آرٹ اور دیگر شعبوں کو مزید بہتر بنانے کے لئے متعدد تجاویز کو حتمی شکل دی جا رہی ہیں۔انھوں نے مزید کہا کہ الحمرا کے پروگرام کی کامیابی الحمرا کے افسران و ملازمین کی ٹیم ورک کا نتیجہ ہے، الحمرا میں آئندہ بھی ایسے پروگرام پیش کئے جائیں گے جن سے عوام کو معیاری تفریحی سہولیات میسر آئیں۔اجلاس میں تمام شعبوں کے افسران نے شرکت کی،اپنے اپنے شعبے کی کارکردگی،اقدامات اور مستقبل کا لائحہ عمل پر روشنی ڈالی۔