جماعتِ اسلامی کا تعظیمِ رسول ﷺ ریلی نکالنے کا اعلان

کراچی (اسٹاف رپورٹر)فرانس میں توہین آمیز خاکوں کی اشاعت پر جماعتِ اسلامی پاکستان نے شدید برہمی کا اظہار کیا ہے۔جماعتِ اسلامی پاکستان نے فرانس میں توہین آمیز خاکوں کی اشاعت اور گستاخی رسول پر شدید برہمی کا اظہار کرتے ہوئے ملک بھر سے تعظیمِ رسول صلی اللہ علیہ وسلم ریلی نکالنے کا اعلان کر دیا۔ادارہ نورِحق کراچی میں پریس کانفرنس کرتے ہوئے امیرِ جماعتِ اسلامی کراچی حافظ نعیم الرحمن نے کہا کہ فرانسیسی صدر رسول اکرم ﷺ کی شان میں گستاخی کر کے مسلم امہ کے جذبات کو مجروح کیا ہے۔انہوں نے کہا کہ زبانی کلامی باتیں بہت ہوئیں، اب ضرورت اس امر کی ہے کہ فوری یورپی سفیر کو ملک سے بے دخل کیا جائے۔امیرِ جماعتِ اسلامی کراچی نے کہا کہ تمام مسلم امہ ایک پلیٹ فورم پر جمع ہوکر ان گستاخوں کے خلاف اپنی آواز بلند کرے، بدھ سے شہر بھر میں تعظیمِ رسول ﷺ ریلیاں نکالی جائیں گی۔حافظ نعیم الرحمن نے یہ بھی کہا کہ رکنِ سندھ اسمبلی عبد الرشید نے اس معاملے کی روک تھام کے لیے سندھ اسمبلی میں اپنی قرارداد بھی جمع کروا دی ہے۔