پاکستان شاہین کے دورہ نیوزی لینڈ میں کوچ کی ذمہ داریاں کون نبھائے گا؟ اعلان ہو گیا

لاہور (ڈیلی پاکستان آن لائن) پاکستان شاہین کرکٹ ٹیم کے دورہ نیوزی لینڈ میں جونیئر ٹیموں کے کوچ اعجاز احمد کو ہی ہیڈ کوچ کی ذمہ داریاں دینے کا فیصلہ کیا گیا ہے۔
تفصیلات کے مطابق پاکستان شاہین نے آئندہ ماہ قومی کرکٹ ٹیم کے ساتھ ہی نیوزی لینڈ کے دورے پر روانہ ہونا ہے جہاں پاکستان شاہین کے دو 4 روزہ اور 5 ٹی 20 میچز شیڈول ہیں، اس ضمن میں جونیئر ٹیموں کے کوچ اعجاز احمد کو ہی ہیڈ کوچ کی ذمہ داریاں دی جا رہی ہیں جبکہ کوچنگ سٹاف میں راؤ افتخار انجم اور محتشم رشید بھی شامل ہیں۔ 
سابق ٹیسٹ کرکٹر اعجاز احمد پاکستان انڈر 19 کرکٹ ٹیم کے ہیڈ کوچ ہیں اور انڈر 19 کے ہیڈ کوچز ایمرجنگ ٹیم کی بھی کوچنگ کے فرائض انجام دے چکے ہیں۔ ذرائع کا کہنا ہے کہ نیشنل ہائی پرفارمنس سینٹر کے کوچز کو سپورٹ سٹاف میں شامل نہیں کیا جا رہا کیونکہ ان دنوں پاکستان انڈر 19 ٹیم کی کوئی مصروفیت نہیں ہے۔
مصروفیت کی صورت میں ہی نیشنل ہائی پرفارمنس سینٹر کے کوچز کو پاکستان شاہین کے کوچنگ سٹاف میں شامل کیا جانا تھا، پاکستان شاہین کے سکواڈ میں ڈومیسٹک کے پرفارمرز کو موقع دیا جائے گا جبکہ پاکستان شاہین اور پاکستان کرکٹ ٹیم کے کھلاڑی ایک دوسرے کی ٹیموں کو بھی دستیاب ہوں گے۔